Bul is-sharalar halyqtyń ál-aýqatyn arttyrady.
Qazaqstannyń Qurylysshylar odaǵy «7-20-25» baǵdarlamasy sharttaryn ózgertip, qaıta iske qosýdy usynyp otyr. Bul týraly atalǵan odaq tóralqasynyń tóraǵasy Talǵat Erǵalıev aıtty, dep habarlaıdy Almaty-akshamy.kz QazAqparatqa silteme jasap.
«Baspasóz máslıhatymyz baspanaǵa muqtaj adamdardy pátermen qamtamasyz etýge arnalady. Memlekettik organdar, Úkimet óz sheshimderin negizdeı almaǵan kezde, árqashan qurylysshylar sheshim bermeı otyr deıdi. Sondyqtan biz sheshim berip qana qoımaı, usynystarymyzdy da jasaǵymyz keledi. Eń aldymen, «7-20-25» baǵdarlamasy shartyn 25 jyldan 35 jylǵa ózgertip, Qazaqstannyń turyn úı kompanıasynyń kepili bar salynyp jatqan úıden páter satyp alýǵa múmkindik berý qajet. Baǵdarlama Qazaqstannyń turǵyn úı kompanıasy aıasynda ǵana jumys isteıtindigin bilesizder. Banktermen jumys istemeıdi», - dedi ol elordada ótken baspasóz máslıhatynda.
Sonymen qatar Talǵat Erǵalıev turǵyn úı qurylysyn arnaýly ekonomıkalyq aımaq aıasynda da júrgizip, ınjenerlik jelilerdi ýaqytyly tartý qajettigin aıtady.
Onyń atap ótýinshe, bul is-sharalar halyqtyń ál-aýqatyn arttyryp, qurylys naryǵy men páter baǵasyn turaqtandyrady. Jumys oryndary sanynyń artýyna sep bolyp, búdjetke salyq túsimderin arttyrady.