Qazaqstanda kópbalaly otbasylarǵa jáne bosaný, bala kútimine baılanysty tabysynan aıyrylǵan azamattarǵa memleketten beriletin áleýmettik tólemder kólemi jyl saıyn artyp keledi. Bul – bir jaǵynan áleýmettik qoldaý júıesiniń keńeıip kele jatqanyn, ekinshi jaǵynan elimizde mundaı kómekke muqtaj otbasylardyń sany azaımaı otyrǵanyn kórsetedi. Aqshamnews.kz tilshisi materıalda dekrettegi analar men ákelerdiń jáne kóp balaly analarǵa beriletin kómek týraly tyń derekterdi tarqatady.
Kópbalaly otbasylar sany - 600 myńnan asty
Eńbek jáne halyqty áleýmettik qoldaý mınıstrligi (EHÁQ - esk.) elimizdegi kóp balaly otbaslardyń sanyn usyndy. Olar Qazaqstan Respýblıkasynyń Áleýmettik kodeksiniń 90-babyna sáıkes, birge turatyn tórt jáne odan da kóp kámeletke tolmaǵan balasy bar, sonymen qatar 23 jasqa deıin kúndizgi bólimde oqıtyn balalary bar otbasylarǵa respýblıkalyq búdjet esebinen arnaıy járdemaqy tólenetinin aıtty. Bul júıe 2020 jyldan bastap engizilip, járdemaqy mólsheri bala sanyna qaraı saralanyp esepteledi.
2025 jylǵy 1 mamyrdaǵy jaǵdaı boıynsha bul járdemaqyny 611,5 myń otbasy alyp otyr. Bul 2019 jylǵy kórsetkishpen (252,1 myń) salystyrǵanda 2,3 esege artyq. Jyldar boıynsha dınamıka mynadaı:
ınfografıka: aqshamnews.kz
Bul ósim, bir jaǵynan, járdemaqy berý júıesiniń jeńildeýimen jáne resimdeý mehanızmderiniń jeńildetilýimen baılanysty. Degenmen bul eldegi demografıalyq ózgerister men áleýmettik jaǵdaıdyń da kórsetkishi.
Járdemaqynyń ortasha mólsheri neshe teńge?
EHÁQ bergen málimetke sensek, 2025 jyldyń alǵashqy tórt aıynda júktilik pen bosanýǵa, jańa týǵan balany asyrap alýǵa baılanysty tabysynan aıyrylǵany úshin 81,8 myń adam áleýmettik tólem alǵan. Bul tólemderdiń ortasha mólsheri – 1 690 493 teńge.
Sonymen qatar, bala bir jarym jasqa tolǵanǵa deıingi kútimge baılanysty tabysynan aıyrylǵany úshin 489,1 myń adam járdemaqy alǵan. Bul sanattaǵy tólemniń ortasha mólsheri 85 221 teńge.
Dekrettegi ákeler sany qansha?
Atalǵan tólem alýshylardyń 99,8%-yn áıelder quraıdy. Iaǵnı, bul sanatta 488 230 áıel jáne nebári 863 er adam ǵana bar. Bul genderlik teńsizdikti emes, kóbine bala kútimimen úıde analardyń qalatynyn, al ákelerdiń eńbek naryǵynan shyqpaıtynyn kórsetedi.
Eske salaıyq, buǵan deıin dekretke shyqqan qazaqstandyq ákeniń áńgimesin jarıalaǵan bolatynbyz. Ol óziniń dekrettegi ómirin áńgimelep, bul sheshimge qalaı kelgenin aıtyp bergen edi.