Bostandyq aýdanynda jol-kólik ınfraqurylymyn damytý jumystary jalǵasyp jatyr. Joldyń sapasyn arttyryp, trotýar salý men múmkindigi shekteýli azamattar úshin kedergisiz orta qurý aýdan ákimdiginiń basym baǵytynyń biri bolyp otyr. 2024–2025 jyldary osy maqsatqa 5 mlrd teńgeden astam qarjy bólinip, ondaǵan kóshede úlken ózgeris bastalǵan. Óńirlik komýnıkasıalar qyzmetinde Bostandyq aýdanynyń ákimi Sanjar Álın bul jumysty qalaı atqaryp jatqandaryn aıtyp berdi.
Ótken jyly aýdanda 1,3 mlrd teńgege 33 kóshedegi 30,5 shaqyrym jolǵa ortasha jóndeý jumysy júrgizilipti. 2025 jyly jóndeý baǵdarlamasy jalǵasady: 19 kóshede 27,5 shaqyrymdaı jol jamylǵysyn jańartý josparlanǵan. Bul maqsatqa 3 mlrd teńge bólindi. Ortasha jóndeýden bólek, bıyl ádetki jol jóndeý jumystary da qatar júrgizilip, 30 myń sharshy metr asfált jamylǵysy qalpyna keltirilgen. Bul jumysqa 500 mln teńge jumsaldy. Jyl sońyna deıin qosymsha 10 myń sharshy metr asfált jabynyn jóndeý josparlanyp otyr, oǵan qosymsha 150 mln teńge bólingen.
Trotýarlardy abattandyrýǵa erekshe kóńil bólingen: 2025 jyly Ótepov, Ábish Kekilbaıuly, Naýryzbaı batyr, Tilendıev, Sadyqov, Mustafın, Rozybaqıev, Radostoves, Shashkın, Toraıǵyrov, Buqar Jyraý men Pomeransev kóshelerin qosa alǵanda, 12 kóshe tehnıkalyq trotýarmen qamtamasyz etildi. Buǵan 308 mln teńge bólindi.
Bıylǵy tamyz aıynan bastap 10 jaıaý júrginshiler ótkelinde – bes jerústi jáne bes jerasty ótkelinde lıftiler men kótergishterdi kúrdeli jóndeý jáne jańǵyrtý jumystary bastalady. Bular erekshe qajettiligi bar azamattarǵa jaıly ári qoljetimdi qalalyq orta qalyptastyrýǵa baǵyttalǵan. Barlyq jumys 2026 jyldyń sońyna deıin aıaqtalady.
Atalǵan jobalardy júzege asyrý kóshe-jol jelisiniń sapasyn edáýir jaqsartyp, qaýipsiz ári jaıly ete túsýge múmkindik berip otyr.