2025 jyldyń sońyna deıín Bostandyq audanynda ekí jańa mektep ashylyp, 10 mektep pen 5 balabaqsha jańartylady
Jaıly mektep» ūlttyq jobasy men bílím beru mekemelerín jańǵyrtu baǵdarlamasy ayasynda Bostandyq audany jańa nysandar salyp, mektepter men balabaqshalardy qaıta qūryp, kúrdelí jóndeuden ótkízíp jatyr. Óńírlík kommunıkatsıyalar qyzmetíníń baspasóz máslıhatynda Bostandyq audanynyń ákímí Sanjar Álın zamanǵa saı oquy úshín balalardyń jaǵdaıyn jasap, oryn tapshylyǵyn azaıtyp, barlyq sanattaǵy balalardyń bílímge qoly jetetíndeı etu negízgí basymdyq ekenín atap óttí.
Bıyl qyrkúıek aıynda audan aumaǵynda «Jaıly mektep» jobasy ayasynda 4000 oqushyǵa arnalǵan ekí jańa mektep ashylady. Mamyr aıynda Rozybaqıev kóshesínde 1500 oryndyq mekteptíń qūrylysy ayaqtaldy. Nysannyń qūny – 7,8 mlrd teńge. Tamyz aıynda Egízbaev kóshesínde 2500 oryndyq taǵy bír úlken mektep salynyp bítpek. Onyń qūny – 11,9 mlrd teńge. Būǵan qosa, qyrkúıek aıynda №73 mektepke qosymsha 450 oryndyq japsarlas ǵımarat salynyp, mektep ǵımaratyna rekonstruktsıya jasalyp bítedí. Būl audan mektepteríndegí júktemení azaıtuǵa múmkíndík bermek.
Jyl sońyna deıín №10 mektep-ınternatta (1,3 mlrd teńge), №189 (2,5 mlrd teńge) jáne №191 (1,7 mlrd teńge) mektepterínde seısmıkalyq kúsheıtumen qatar kúrdelí jóndeu jūmystary ayaqtalady. Sondaı-aq Respublıkalyq fızıka-matematıka mektebíníń ǵımaraty qaıta jańartylyp jatyr. Būl jobaǵa 5,5 mlrd teńge bólíngen. Atalǵan jobalardyń jalpy qūny – 11 mlrd teńge. Sáuír aıynda №60 mekteptí jańǵyrtu jūmysy bastaldy. 5,7 mlrd teńge somasyna júrgízílíp jatqan būl jūmysty 2026 jyldyń qyrkúıegínde ayaqtamaq oıda.
Balabaqshadaǵy oryn tapshylyǵyn azaıtu úshín bıylǵy nauryz aıynda Orbıta-3 shaǵynaudanyndaǵy būrynǵy balalar úıíníń ekí ǵımaraty qaıta jóndeuden óttí. Onyń bírí – 240 oryndyq balabaqsha retínde, ekínshísí – erekshe bílím berudí qajet etetín balalarǵa arnalǵan 100 oryndyq arnauly túzetu balabaqshasy retínde jūmys ísteıdí. Qūrylys jūmysynyń qūny – 3,6 mlrd teńge. Sonymen qatar 2025 jyldyń sońyna deıín №81, №87 jáne №137 balabaqshalarynda seısmıkalyq kúsheıtumen qatar kúrdelí jóndeu júrgízíledí. Būl jobalarǵa jalpy 4,3 mlrd teńge bólíngen.
Mańyzdy jobanyń bírí – jańa Oqushylar úıíníń qūrylysy boldy. Sáuír aıynda 1964 jyly salynǵan eskí ǵımarat būzylyp, onyń ornyna osy zamanǵy jańa nysan boı kóterdí. 2025 jyldyń mausym aıynda Oqushylar úıí audandaǵy balalar men jasóspírímderge ashyq boldy.
Atalǵan jobanyń barlyǵy Bostandyq audanyndaǵy bílím beru júıesín jańǵyrtuǵa baǵyttalǵan auqymdy baǵdarlamanyń bír bólígí jáne ósíp kele jatqan ūrpaqtyń sapaly bílím alyp, jan-jaqty damuyna qolaıly jaǵdaı jasauǵa arnalǵan.