Bostandyq aýdanynda júıeni jańartý men ınjenerlik ınfraqurylymdy damytý basty mindettiń biri bolyp qala bermek. Bıyl sý qubyry, káriz, jylý men jaryq jelilerin salyp, qaıta jańartý boıynsha aýqymdy jumys qolǵa alynǵan. Bular ondaǵan kósheni, turǵyn alańdary men shaǵyn aýdandardy qamtyp otyr. Jobalanǵan, iske asyrylyp jatqan jeliniń jalpy uzyndyǵy 150 shaqyrymnan asady, ınvestısıa kólemi – 35 mlrd teńgeden joǵary. Bostandyq aýdanynyń ákimi Sanjar Álın Óńirlik komýnıkasıalar qyzmetinde osy jumystyń barysyn baıandady.
Sý qubyry men sý burý júıesi úzdiksiz jumys isteýi úshin 2025 jyldyń sońyna deıin aýdannyń tórt kóshesinde 8 shaqyrym ınjenerlik jeli qaıta jańartylady. Maýsym aıynda eń úlken jobanyń biri – táýligine 9 myń m³ sý óndiretin sý alý qurylǵysynyń qurylysy bastaldy. Bul joba aýdannyń ońtústik bóligindegi 25 myńnan astam turǵyndy sýmen qamtamasyz etpek. Nysannyń quny – 10,4 mlrd teńge, ol 2026 jyldyń sońynda aıaqtalady.
2025 jyldyń mamyr aıynan bastap tótenshe jaǵdaıdyń saldaryn joıý jumysy jalǵasyp jatyr: Úshkempirov, Araıly, Taldy jáne Ortalyq kóshelerinde shamamen 7 shaqyrym magıstraldi sý men káriz jelisi salyna bastady. Bul joba Asqartaý, Ermensaı, Aqtóbe shaǵyn aýdandaryn, «Remızovka», «Sakýra», «Dınastıa» turǵyn úı keshenderin, sondaı-aq «Remızovka», «Drýjba», «Kýrortnoe» baý-baqsha seriktestigin qala ınfraqurylymyna qosýdy kózdeıdi. Jumys jyldyń sońyna taman bitpek.
2025 jyldyń qyrkúıeginde Nurlytaý shaǵyn aýdanynda 63,5 shaqyrym sý qubyrymen 33,6 shaqyrym káriz jelisin salý úshin memlekettik saraptamanyń oń qorytyndysyn kútip otyr. Qurylys qazan aıynda bastalyp, 2026 jyldyń sońynda aıaqtalady. Jobanyń quny – 18 mlrd teńge.
Mamyr aıynan bastap, jylytý maýsymy aıaqtalǵannan keıin, 7,1 shaqyrym jylý jelisin qaıta jańǵyrtý men eki sorǵy stansıasyn jańartý boıynsha 15 joba iske asyryla bastady. Bul jylý jelileri 60,6%-ǵa tozǵandyqtan qolǵa alynǵan. 5,9 mlrd teńgelik jumys 2025 jyldyń qazanynda aıaqtalmaq.
Jyl basynan beri aýdan aýmaǵynda kóshe jaryǵyn jańartý jumystary bastaldy. 19,6 shaqyrym eski kabel aýystyrylyp, 70 jańa baǵana men 2600 sham ornatyldy. Bul jumys 80 kóshe men 100 aýlany qamtydy. Jyl sońyna deıin taǵy 40 shaqyrym kabel jelisi aýystyrylyp, 230 baǵana men 3 myń sham ornatylmaq. Tamyz aıynda 65 kóshede jańa syrtqy jaryqtandyrý jelileriniń qurylysy bastalady: 28 km áýe jelisi tartylyp, 778 baǵana men sonsha sham ornatylady. 510 mln teńgelik jobanyń aıaqtalýy 2025 jyldyń jeltoqsanyna josparlanǵan.
«Injenerlik ınfraqurylymdy keshendi damytý aýdan turǵyndarynyń ómir sapasyn aıtarlyqtaı jaqsartyp, qalalyq ortanyń turaqty damýyn qamtamasyz etedi», – dep atap ótti Sanjar Álın.