Qytaı 5.5G ınternet jelisin álemde birinshi bolyp qoldanysqa engizgeli jatyr.
Mobıldi jeli 5G-den qaraǵanda 10 ese jyldam. Bul joba aldymen pılotsyz kólikterdi basqarý júıesinde qoldanylyp, synaqtan ótti. Synaq sátti júzege asqan. Endi ony ıntellektýaldyq óndiris salasyna engizý kózdelip otyr, dep habarlaıdy Almaty-akshamy.kz 24.kz-ke silteme jasap.
Jańa mobıldi baılanys 5G-A dep te atalady. Mamandar bastapqy tájirıbede tapsyrys jetkizýge arnalǵan pılotsyz júretin 100 kólikti jelige qosyp kórdi. Internettiń asa jyldamdyǵy qozǵalys qaýipsizdigi men jumys tıimdiligin arttyrǵan. Jelini synaý áli tolyq aıaqtalǵan joq. Qazir Beıjińde tekserý jumystary jalǵasyp jatyr.
«Kólikter jolda túrli kedergilerge tap bolatyn. Kóp jaǵdaıda jaıaý júrginshiler, baǵdarshamǵa toqtaǵan ózge de kólikter joldy bógeıdi. Osy sebepti biz 5.5G ınternetiniń bazalyq stansıalaryn jaqyn etip ornalastyrýǵa mán berdik. Osynyń arqasynda baǵdarsham belgileri kólik bazasyna birden jetedi. Synaq kúrdeli joldarmen júrý kezinde óte yńǵaıly bolyp shyqty», - deıdi bas sáýletshi Szen Venda.
Qazir elde 5G ınternettiń jyldamdyǵy jasandy ıntellektini paıdalaný, 3D jobalardy jasaý kezinde jetkiliksiz bolyp otyr. Zamanaýı tehnologıanyń talaptaryna tolyq saı kelmeıdi. Naqtyraq aıtsaq, ótkizý múmkindigi tómen. Ári elektr qýatyn shamadan tys kóp tutynady.
«5.5G osy máseleni joıýǵa múmkindik berdi. Bul 5G men 6G arasyndaǵy ótpeli kezeń dese bolady. Jeliniń múmkindigin arttyrǵan saıyn túrli salada sıfrlyq ónimdiliktiń qýaty kúsheıe túsedi. Qyzmettiń jańa túrleri paıda bolady. Jańa jeli ekonomıkalyq jaǵynan da óte tıimdi», - deıdi Qytaıdyń elektrondy-aqparattyq ındýstrıasyn damytý ınstıtýtynyń ǵalymy Súı Chang.
Qazir qytaılyq baılanys operatorlary 5.5G ınternetti qosýǵa daıyndalyp jatyr. Bastapqyda bul jeli eldiń 300 qalasyna ornalastyrylǵaly otyr. Qazirdiń ózinde eldiń 20 provınsıasyna myńnan astam bazalyq stansıa qurylyp qoıylǵan. Olardyń bári bıyl tolyqtaı komersıalyq qoldanysqa engizilmekshi.