QR Eńbek jáne halyqty áleýmettik qorǵaý mınıstri Svetlana Jaqypova Qostanaı oblysyna jumys sapary barysynda Sh. Qabylbaev atyndaǵy QR İİM Qostanaı Akademıasynyń ǵımaratynda uıymdastyrylǵan evakýasıalyq pýnktke bardy. Sondaı-aq, ol «Sosnovyı bor» shıpajaıynda ornalasqan sý tasqynynan zardap shekkenderdiń tynys tirshiligimen tanysty.
Svetlana Jaqypova jumys saparyn QR İİM Qostanaı akademıasyndaǵy evakýasıalyq pýnktke barýdan bastady. Munda 31 adam ýaqytsha ornalastyrylǵan. Sý tasqynynan zardap shekkenderge barlyq qajetti medısınalyq jáne psıhologıalyq kómek kórsetilýde, kúnine úsh ret tamaqtandyrylady, sondaı-aq adamdar birinshi kezekte qajetti quraldarmen qamtamasyz etilgen.
Budan keıin EHÁQM basshysy Altynsarın aýdanyndaǵy «Sosnovyı bor» shıpajaıyna bardy, onda múgedektigi bar adamdar, zeınetkerler jáne tolyq emes otbasylardy qosa alǵanda, sý tasqynynan zardap shekken 23 adam ornalastyrylǵan.
«Elimizdegi qazirgi jaǵdaı kúrdeli bolyp otyr. Osyǵan oraı memleket tabıǵı sý apatyna qarsy kúres boıynsha barlyq qajetti sharalardy qabyldaýda, sondaı-aq zardap shekkenderge túrli qoldaý sharalaryn kórsetýde. Eńbek jáne halyqty áleýmettik qorǵaý mınıstrligi TJ rejımi jarıalanǵan qalalar men aýdandarda 5 myń otbasyna memlekettik organdarǵa júginbeı ataýly áleýmettik kómekti avtomatty túrde taǵaıyndaýdy júzege asyrdy. Sondaı-aq, TJ rejıminiń qoldanylý kezeńinde balalardy qosa alǵanda, 4 myńǵa jýyq adam úshin múgedektikti qaıta kýálandyrý merzimderi avtomatty túrde uzartyldy. Múgedektigi boıynsha járdemaqy tóleý buryn belgilengen top boıynsha júzege asyrylady. Kásipodaqtar federasıasymen birlesip respýblıkanyń 7 sanatorııinde sý tasqynynan zardap shekken áleýmettik osal sanattarǵa jatatyn azamattarǵa ýaqytsha bolý jáne saýyqtyrý múmkindigi berildi», – dedi Svetlana Jaqypova.
Qostanaı oblysy ákimdiginiń málimetinshe, sý tasqyny kezinde óńirde 9 114 adam qutqarylyp, evakýasıalandy, ýaqytsha ornalastyrý pýnktterinde 181 adam qonystanǵan.