Almatyda Qulager shaǵyn aýdany turǵyndarynyń súıikti serýendeý orny – «Gúlder» saıabaǵynda «Jas jubaılar aleıasy» saltanatty túrde ashyldy. İs-shara «Almaty – bizdiń ortaq úıimiz» naýqany men Qozy Kórpesh - Baıan Sulý kúni aıasynda ótti.
Baqyttan basy aınalǵan jastar saıabaqta Mendelsonnyń sherýi aıasynda tirkeldi, jas otbasylarǵa aqsaqaldar bata berdi. Jas jubaılar aleıasynyń ashylýyna arnaıy shaqyrylǵan qazaqstandyq estrada juldyzdary merekelik keshtiń kórigin qyzdyrdy.
«Kúıeýim Iýrıı ekeýmiz 17 sáýirde kezdestik, dál osy kúni tirkeldik. Týystarymyzben nekemizdi tirkeýge keldik, bizdiń odaqtyń belgisi retinde aǵash otyrǵyzýdy usynǵan kezde tań qaldyq», - dedi qýanyshy qoınyna syımaǵan saltanatty sharaǵa qatysýshylardyń biri Tatána Stepanova.
Almatyda 2023 jyly 16 myńnan astam neke, 2024 jyldyń birinshi toqsanynda 4399 neke, al 15 sáýirde «Qozy Kórpesh - Baıan Sulý» kúni 92 neke tirkelgen.
Buǵan qosa, munda «Gúlder» saıabaǵynda jas jubaılar men is-sharanyń basqa qatysýshylary 30-ǵa jýyq japyraqty qaraǵash kóshetin otyrǵyzdy. Barlyq qajetti qural-jabdyqty (qolǵap, kúrek jáne kóshet) Jetisý aýdanynyń ákimdigi usynǵan.
«Búgin erekshe kún, nekemizdi tirkeý mundaı bolady dep eshqashan oılaǵan emespiz. Keremet áser aldyq, aıtýly kúnniń qurmetine aǵash otyrǵyzdyq. Otasqandaryna 50 jyl bolǵan ata-apamyz bizge baqyt tilep, bata berdi. Osyndaı mereke úshin rahmet, biz bul kúndi eshqashan umytpaımyz!», - dedi kúıeý jigit Aıdyn Ábdiraıymov.
Esterińizge sala keteıik, 8 sáýir men 8 mamyr aralyǵynda Almatyda «Almaty – bizdiń ortaq úıimiz» naýqany ótip jatyr. Árbir turǵyn qalanyń damýy men abattandyrylýyna óz úlesin qosa alady.
Barlyq aqparat almaty.kz saıtynda, Almaty ákimdiginiń áleýmettik jelilerinde ornalasqan. Sondaı-aq, veb-saıtqa arnaıy QR-kod arqyly qala boıynsha ornalastyrylǵan bannerlerde, plakattarda jáne afıshalarda kirýge bolady.
Naýqannyń belsendi qatysýshylaryna arnalǵan áleýmettik jelidegi heshtegter: #AlmatyNashObshııDom, #NasMnogoGorodOdın, #AlmatyBizdińOrtaqÚıimiz, #BizKóppizQalajalǵyz.