Almaty emhanalarynda «Almaty - ortaq úıimiz» naýqany aıasynda turǵyndardan merzimi ótip ketken dári-dármekti qabyldaý merzimsiz naýqany bastaldy.
Bul bastama merzimi ótip ketken dárini durys kádege jaratý jáne onyń qorshaǵan ortaǵa tıgizetin áseri týraly halyqtyń habardarlyǵyn arttyrýǵa baǵyttalǵan.
Kóbimiz merzimi ótip ketken dári-dármekti qalaı durys joıý kerek ekenin bilmeı, úıde saqtap jatamyz. Nátıjesinde mundaı dári qorshaǵan ortany lastaý kózine aınalýy nemese densaýlyqqa keri áser tıgizýi múmkin.
Bul naýqan turǵyndarǵa merzimi ótip ketken dári-dármekti qaýipsiz joıýǵa kómektesý úshin uıymdastyrylǵan. Ol úshin ár emhanada arnaıy jáshik ornatylǵan.
Turǵyndar mundaı jáshikter qaı emhanada ornatylǵany týraly aqparatty Almaty.kz saıtynan ala alady.
Atalǵan jáshikterge:
- tutas kúıinde blısterde tabletkalardy;
- tyǵyz baılanǵan pakette qaptamasyz kapsýla tabletkalardy;
- tyǵyz baılanǵan pakette analızge arnalǵan bankalardy;
- suıyqtyǵy bar flakondardy: sırop, tamshy jáne t.b. Eger ol aǵyp jatsa, ony tyǵyz baılanǵan pakette;
- tutas jáne qoldanylǵan ampýlalardy tyǵyz baılanǵan pakette;
- jaqpa, gelder, qaqpaǵy bolmasa tyǵyz baılanǵan pakette
salýǵa bolady.
Betperde, qolǵap, aıaqqap, shprıs jáne ınesi bar ıneksıalyq júıeler, paıdalanylǵan tańǵyshtar (jabysqaq plasyr, dáke, maqta) qabyldanbaıdy.
Biz barlyq turǵyndy osy bastamaǵa qosylyp, salaýatty jáne taza qorshaǵan ortany saqtaýǵa úles qosýǵa shaqyramyz.
«Qazirgi tańda merzimi ótken dárilerdi qaıta óńdeýge ákelýge bolatynyn aıtqymyz keledi. Aksıa aıasynda arnaıy jáshikter qarastyrylǵan. Naýqan maqsaty - qorshaǵan ortaǵa beı-jaı qaramaý. Sondyqtan óz ómirizge ózimiz uqypty qaraıyq», - dedi №5 qalalyq emhanasynyń dırektory Sáýle Tólegenova.
Sonymen birge naýqanǵa qala turǵyndary da belsendi qatynasyp, óz úlesterin qosyp júr.
«Buryn merzimi ótken dári-dármekterimdi qaıda ótkizetinimdi bilmeı júr edim. Endi osy aksıany el-jurt dárilerdi ýtılızasıa jiberý kerektigin túsinip bilip jatyr», - dedi qala turǵyny Aıgúl Naızabekova.