Shyn muqtajdar anyqtalady.
Áleýmettik kómek kórsetýdiń jańa tásilderi talqylandy, dep habarlaıdy aqshamnews.kz
Mınıstrlik AÁK taǵaıyndaýǵa úmitker qazaqstandyqtardyń negizgi shyǵystaryn esepke alý jáne verıfıkasıalaý tetigin pysyqtap jatyr
Eńbek jáne halyqty áleýmettik qorǵaý mınıstrliginde ataýly áleýmettik kómek kórsetýdiń jańa tásilderi usynylyp, talqylandy, dep habarlady vedomstvonyń baspasóz qyzmeti.
Memleket basshysy azamattardyń shyǵysyn eskere otyryp, ataýly áleýmettik kómek kórsetý tásilderin qaıta qaraý mindetin qoıǵan bolatyn.
"Osyǵan baılanysty Otbasynyń sıfrlyq kartasy men memlekettik jáne memlekettik emes uıymdardyń júıelerimen ıntegrasıalardy paıdalana otyryp, áleýmettik kómek kórsetýdi transformasıalaý josparlanyp otyr", - dep jazylǵan habarlamada.
Eńbek jáne halyqty áleýmettik qorǵaý mınıstrligi Áleýmettik kómek departamentiniń basshysy Aınur Ábdirahmanovanyń aıtýynsha qazirgi ýaqytta mınıstrlik múddeli memlekettik organdarmen birlesip AÁK taǵaıyndaýǵa úmitker qazaqstandyqtardyń negizgi shyǵystaryn esepke alý jáne verıfıkasıalaý tetigin pysyqtap jatyr.
Jyljymaly nemese jyljymaıtyn múlikti satyp alýǵa, oqý aqysy men qosymsha bilim alýǵa, demalys pen oıyn-saýyqqa, saýyqtyrýǵa, jıhaz, turmystyq tehnıka zattaryn satyp alýǵa, kredıtterdi óteýge jáne t.b. shyǵystardyń túrlerin qarastyrý josparlanýda.
"Usynylyp otyrǵan algorıtm AÁK taǵaıyndaýǵa ótinish bergen azamattarǵa olardyń kiristeri men shyǵystaryn tekserýge kelisim alý úshin SMS-habarlama jiberýdi kózdeıdi. Bul banktik qupıany ashý jáne úshinshi tulǵalarǵa aqparatqa qol jetkizýge qatysty emes. Tekserýler aqparattyq júıelerdi ıntegrasıalaý esebinen avtomatty túrde júrgiziledi", – dedi Aınur Ábdirahmanova.
Sondaı-aq AÁK taǵaıyndaý tetigindegi aldaǵy ózgerister shyn máninde muqtaj azamattardy anyqtaýǵa jáne olarǵa memleket tarapynan nysanaly qoldaýdy qamtamasyz etýge múmkindik beretini atalyp ótti.
Buǵan deıin habarlanǵandaı, 2024 jylǵy 1 tamyzdaǵy jaǵdaı boıynsha 70,2 myń otbasyndaǵy 372 myńǵa jýyq azamatqa ataýly áleýmettik kómek kórsetildi. Bıyl bul maqsattarǵa búdjetten 60,5 mlrd teńge qarastyrylǵan.