20-21 maýsymda Astanada Halyqaralyq volonterler forýmy ótedi.
Bul týraly Aqparat jáne qoǵamdyq damý vıse-mınıstri Danıar Qadyrov aıtty, dep habarlaıdy Almaty-akshamy.kz.
«Memleket basshysy Qasym-Jomart Toqaevtyń Volonterlerdi jumyldyrýdyń halyqaralyq jylyn ótkizý jónindegi BUU-nyń 75-sessıasynda aıtylǵan bastamasy aıasynda elimizde jyl saıyn halyqaralyq deńgeıdegi is-sharalar uıymdastyrý dástúri qalyptasqan. Byltyr Ortalyq Azıa volonterleriniń forýmy ótse, bıyl 20-21 maýsymda Astanada Halyqaralyq volonterler forýmyn ótkizý josparlanýda», - dedi Danıar Qadyrov Ortalyq komýnıkasıalar qyzmetindegi baspasóz máslıhatynda.
Forýmnyń negizgi maqsaty – volonterler qozǵalysyn damytý jáne qoldaý salasyndaǵy qazaqstandyq tájirıbeni tanystyryp, halyqaralyq arenada eldiń oń ımıjin qalyptastyrý.
Forýmǵa daıyndyq jumystary Qazaqstandaǵy BUU-nyń Eriktiler baǵdarlamasynyń ókildigi, Azıadaǵy ózara is-qımyl jáne senim sharalary jónindegi keńes hatshylyǵy, «Ulttyq volonterlik jelisi» jáne basqa da volonterlik jáne halyqaralyq uıymdarmen áriptestik qarym-qatynasta júrgizilýde.
«Bul jıyn 34 shet eldiń jáne Qazaqstannyń barlyq óńirleriniń delegattarynyń qatysýymen ótetin volonterlik saladaǵy iri halyqaralyq shara bolady. Oǵan 400-ge jýyq adamnyń qatysýy josparlanýda, onyń 140-qa jýyǵy sheteldik qatysýshylar men halyqaralyq uıymdardyń ókilderi», - dedi D. Qadyrov.
Forýmǵa qatysýǵa qyzyǵýshylyq tanytqandardyń kóptigine jáne volonterlerdiń usynysyna oraı, óńirlik qatysýshy-volonterlerdi irikteý konkýrsy ótken. Osylaısha 80 volonter óńirlik delegattar bolyp belgilendi.
Volonterler forýmynyń slogany, heshtegi men logotıpi retinde «İzgilik tegi» sımvoly bekitilgen. Bul - jynysyna, jasyna, ultyna jáne basqa da erekshelikterine qaramaıtyn, barlyq adamdarǵa tán «İzgilik tegi». Forýmnyń urany «Tektegi izgilikti oıat!» dep atalady.
Sonymen birge, forým aıasynda elordada Halyqaralyq volonterlik ortalyq ashylady. Búginnen bastap Zerendide volonterler, volonterlik uıymdardyń jetekshileri men óńirlik front-ofısterdiń mamandarynyń qatysýymen «Volonterlerdiń jazǵy mektebi» óz jumysyn bastady.