Qazaqstannyń shaǵyn kólemdi flotynda 19 myńǵa jýyq keme bar.
Úkimet otyrysynda Indýstrıa jáne ınfraqurylymdyq damý mınıstri Marat Qarabaev elimizdiń sý aıdyndaryndaǵy qaýipsizdikti kúsheıtý boıynsha qolǵa alynǵan jumystar jaıly aıtty, dep habarlaıdy Almaty-akshamy.kz.
Cýmen júretin kólikterdiń basym bóligi Alakól jáne Balqash kólderinde, Buqtyrma men Qapshaǵaı sý qoımalarynda, sondaı-aq Kaspıı teńiziniń jaǵalaýynda qatynap júr.
Maýsym aıynan bastap kólik baqylaý ınspeksıalary «Nazar aýdaryńyz! Shaǵyn flot!» respýblıkalyq is-sharasyn ótkizýdi qolǵa alǵan. Bul arqyly elimizde shaǵyn kólemdi kemelerdi qaýipsiz paıdalanýdy jolǵa qoıyp, jaǵalaýlardyń mańyndaǵy demalý oryndarynda halyqtyń qaýipsizdigin saqtaý kózdelip otyr. Atalǵan is-shara 31 tamyzǵa deıin jalǵasady.
«Byltyr elimizdiń sý aıdyndaryndaǵy qaýipsizdikti baqylaý úshin 3061 tekserý jumysy júrgizilip, onyń nátıjesinde shaǵyn kemelerge qatysty 795 ákimshilik quqyqbuzýshylyq anyqtaldy. Olar jeke qutqarý quraldarynyń bolmaýy, kemeni qujatsyz paıdalaný men basqarý, navıgasıalyq belgilerdiń talaptaryn saqtamaý, sondaı-aq kemedegi qaldyqtar pen basqa da zattardy sý aıdyndaryna tógýge qatysty boldy», - dedi M.Qarabaev.
Jergilikti atqarýshy organdarǵa ótinishterdi jiberýdiń nátıjesinde ustalǵan sý kólikterine arnalǵan aıyp turaqtary Aqmola, Batys Qazaqstan jáne Túrkistan oblystarynda quryldy. Alaıda Almaty, Shyǵys Qazaqstan, Qaraǵandy, Mańǵystaý, Abaı jáne Jetisý oblystarynda bul baǵyttaǵy jumys kenjelep tur. Mınıstr bul óńirlermen qajetti jumys jalǵasatynyn jetkizdi.