Qazaqstan Respublıkasynyń Táuelsízdígí kúní merekesí qarsańynda Almaty qalasy Alatau audanyndaǵy Gúlnara Ahmetova basshylyq etetín №210 mektep-lıtseıde «Jas sarbaz» áskerı-patrıottyq jáne Ūlttyq ūlan batyrlary atyndaǵy «Erlík synybynyń» ashylu saltanaty óttí. Būl ıgí shara Qazaqstan Respublıkasynyń Ūlttyq ūlanymen bírlese otyryp, Almaty qalalyq Bílím basqarmasynyń qoldauymen ūıymdastyryldy.
Áskerı-patrıottyq baǵyttaǵy ís-sharanyń negízgí maqsaty – oqushylardyń boıynda Otanǵa degen súıíspenshílíktí, tuǵan jerge degen qūrmettí, qazaqstandyq patrıotızmdí qalyptastyru. Batyr babalarymyzdyń jáne qazírgí zaman batyrlarynyń erlíkterín úlgí ete otyryp, oqushylardy batyldyqqa, tózímdílíkke, tártípke jáne jauapkershílíkke tárbıeleu. Sondaı-aq, sporttyq sharalar, oqu-jattyǵular arqyly jastardyń denesín shyńdap, salauatty ómír saltyn ūstanuǵa baulu. Kásíbı baǵdar bere otyryp, bolashaqta Qazaqstan Qaruly Kúshteríníń qataryn tolyqtyruǵa daıyndau, áskerı mamandyqtarǵa degen qyzyǵushylyǵyn arttyru.
Oqushylar saltanatty túrde ant qabyldaǵan soń, «Jas sarbaz» qataryna resmı qabyldanyp,«Jas sarbaz» gımnín oryndady. 5571 áskerı bólímíníń áskerı orkestrí patrıottyq ánderdí oryndap, oqushylardy ruhtandyra tústí. Būdan árí merekelík kóńíl kúımen Ūlttyq ūlan batyrlary atyndaǵy «Erlík synybynyń» saltanatty ashylu rásímí boldy. Zamanauı talaptarǵa saı jabdyqtalǵan jańa synyptyń lentasyn Ūlttyq ūlan ardagerí otstavkadaǵy polkovnık Sábıt Aımaǵambetov, mektep-lıtseı dırektorynyń oqu ísí jóníndegí orynbasary Saltanat Ashımbaeva jáne Almaty qalalyq dene shynyqtyru jáne sport ǵylymı-zertteu ortalyǵy alǵashqy áskerı jáne tehnologıyalyq daıyndyq bólímíníń jetekshísí Marat Qanatov qıdy.
Ís-shara qonaqtary Otanǵa adal boluǵa ant bergen jas sarbazdarǵa sáttílík tílep, osyndaı ís-sharalardyń óskeleń ūrpaq tárbıesí úshín mańyzyn atap óttí.
Osy mekteptíń alǵashqy áskerı daıyndyq páníníń mūǵalímí zapastaǵy polkovnık Nıyaztaı Álkeshev:
- Búgín 5 synyp oqushylaryn «Jas sarbaz» áskerı-patrıottyq synybyna qabyldadyq. Olar jas sarbazdardyń antyn qabyldady. Oqushylarǵa áskerı-patrıottyq tárbıe jáne kásíptík baǵdar beru jūmystary toqtamaıdy. Arnaıy baǵdarlama boıynsha ís-sharalar júrgízílíp tūrady. «Jas sarbaz» synybynyń oqushylary mektep bítírgen soń, kúshtík qūrylym mamandaryn daıyndaıtyn oqu oryndaryna túsuge joldama alady, - dedí.
