Eńbek jáne halyqty áleýmettik qorǵaý mınıstrligi ókilderi 2024 jyly kimderdiń jalaqysy qalaı ósetinine jaýap berdi, - dep habarlaıdy almaty-akshamy.kz.
Tengrinews.kz-ke bergen vedomstvonyń resmı jaýabynda mınıstrlik eńbek zańnamasyna sáıkes azamattyq qyzmetkerlerge eńbekaqy tóleýdi retteıtini aıtylady. Olardyń eńbegine aqy tóleý júıesi memlekettik mekemeler men qazynalyq kásiporyndardyń barlyq qyzmetkeri úshin biryńǵaı sanalady.
"Memleket basshysynyń 2021 jylǵy 1 qyrkúıektegi "Halyq birligi jáne júıeli reformalar - el órkendeýiniń berik negizi" atty Qazaqstan halqyna joldaýynda aıtylǵan tapsyrmasyn oryndaý úshin 2022 jylǵy 1 qańtardan bastap laýazymdyq mindetterine túzetý koefısıentin qoldaný arqyly azamattyq qyzmetkerlerdiń jekelegen sanattarynyń (pedagogterdi, medısınalyq jáne áleýmettik qyzmetkerlerdi qospaǵanda) jalaqysyn kezeń-kezeńimen arttyrý bastaldy", - delingen jaýapta.
2022 jyly bul koefısıenttiń mólsheri 1,23 bolsa, 2023 jyly 1,45-ke jetti. 2024 jyly ol 1,71-ge, al 2025 jyly 2,0-ge deıin kóteriledi. Osylaısha, tórt jyl ishinde azamattyq qyzmetkerlerdiń jalaqysy eki esege ósedi.
Sondaı-aq, mınıstrlik Memleket basshysynyń tapsyrmasy boıynsha 2024 jylǵy 1 qańtardan bastap eń tómengi jalaqy mólsherin (ETJ) 70 myńnan 85 myń teńgege deıin arttyrý josparlanǵanyn habarlady.
Mınıstrliktiń boljamyna sáıkes, osyǵan oraı menshiktiń ártúrli nysanyndaǵy kásiporyndarda barlyq salada jumys isteıtin 1,8 mıllıonǵa jýyq jaldamaly qyzmetkerdiń tabysy ósedi.
gov.kz málimetine súıensek, QR Eńbek kodeksine sáıkes qazynalyq kásiporyndar men memlekettik mekemelerde shtattyq laýazymdy atqaratyn adamdar azamattyq qyzmetkerler sanalady.
Aqparat derekkózi: https://massaget.kz/basty-zhaalytar-438/94997/