Almaty-akshamy.kz saıtynda búgin jarıalanǵan jańalyqtarǵa sholý – kún kerýeni
Jer dúmpýi basylmaı jatyr...
24 qańtar kúni tańerteń Almatydan 212 shaqyrym jerde taǵy da jer silkinisi boldy. Jer silkinisiniń energetıkalyq klasy 10,3 boldy. Magnıtýdasy – 4,4. Jer silkinisi 10 shaqyrym tereńdikte boldy. Qazaqstan aýmaǵynda jer silkinisi sezilgen joq, almatylyqtar dúmpýdi sezgen joq. Seısmologtar tańǵy saǵat 7:35-te Almatydan ońtústik-shyǵysqa qaraı 250 shaqyrym jerde Qyrǵyzstan men Qytaı shekarasynda kezekti jer silkinisin tirkedi. Almatylyqtar muny da sezgen joq.
Budan keıin Almaty ýaqyty boıynsha saǵat 14:03-te barlyǵy bes jer silkinisi tirkeldi. Sońǵy jer silkinisiniń oshaǵy Almatydan ońtústik-shyǵysqa qaraı 271 shaqyrym jerde Qytaı aýmaǵynda ornalasqan. Magnıtýdasy - 4,7.
Tilsiz jaý da jaǵalasyp...
Almaty oblysy tótenshe jaǵdaılar departamentiniń málimetinshe, búgin tańǵy saǵat 7 shamasynda kezekshi bólimge İle aýdanynyń Pervomaı ónerkásip aımaǵynda metal konstrýksıalarynan jasalǵan, aýmaǵy 3600 sharshy metr bolatyn polıetılen taýarlary saqtalǵan qoımadan órt shyqty. Zardap shekkender joq.
Órtti sóndirýge Almaty oblysy TJD 37 qyzmetkeri men 14 tehnıkasy jáne Almaty qalasynan 22 maman men 4 órt sóndirý mashınasy jumyldyryldy.
Órttiń kesirinen Almatyny qara tútin basty
Saǵat 7:00-den 9:20-ǵa deıin qara tútin kóterilip, birneshe shaqyrymǵa sozyldy, jeldiń azdyǵynan tútin baıaý ótip, qala shegine shamamen 3 saǵat boıy tarady.
Almaty qalasynyń ekologıa jáne qorshaǵan orta basqarmasynyń málimetinshe, qalanyń soltústik bóliginde atmosferalyq aýanyń nasharlaýyna jáne qara tútinniń paıda bolýyna İle aýdanyndaǵy Birinshi Mamyr ónerkásiptik aımaǵyndaǵy órt sebep boldy.
Kóbeı, qazaq!
Buǵan deıin úsh balasy bar astanalyq kelinshek úshem bosandy. Sábılerdiń anasy Ajar Qabıtova jubaıymen birge 2020 jyly dúnıege kelgen qyzdary men 2022 jyly týǵan egiz balalaryn tárbıelep otyr. Úshemniń bári – ul. Balalardyń salmaǵy – 3 myń, 2 300 jáne 2 500 gram. Jańa týǵan náresteler bir aptaǵa jýyq ýaqyttan beri №2 qalalyq kópsalaly aýrýhanada jatyr.
Astanalyq úshemderdiń úsheýi de ul bolsa, saryǵashtyq jas ana Gúlmıra Daýrbaeva úsh qyzdy dúnıege ákeldi. Sóıtip, saryaǵashtyq batyr ana búgin 8 balanyń anasy atandy. Merziminen buryn dúnıe esigin ashqan nárestelerge jansaqtaý bóliminiń mamandary tarapynan erekshe kútim jasalǵan.
20 mınýtta JSN alasyń!
Endi elimizde jańa týǵan balaǵa birden JSN beriledi, buryn bul pılottyq joba bolǵan.
Májilis baılanys, sıfrlandyrý jáne aqparattandyrý salasynyń ınvestısıalyq ahýalyn arttyrý máseleleri boıynsha zań jobasyn birinshi oqylymda maquldady.
Baılanysymyz vırtýaldy bola ma?
Májilistiń jalpy otyrysynda talqylanǵan zań jobasy boıynsha, Qazaqstanda vırtýaldy uıaly baılanys operatoryn engizý qarastyrylyp jatyr. Qazir vırtýaldy baılanys operatoryn paıdalaný boıynsha halyqaralyq tájirıbe qalyptasqan. Olar qazir jumys istep turǵan baılanys operatorlarynan trafıkti jalǵa alady. Ámbebap SIM-kartasy jaqyn turǵan kez kelgen antenadan baılanys sıgnalyn alady. Mundaı kartalardyń tarıfteri birshama qymbatyraq bolady, sondaı-aq búkil el boıynsha úzdiksiz baılanysqa múmkindik jasalady.
«Kári qudań álek saldy...»
Aýa raıynyń qolaısyzdyǵy kesirinen 2 oblystaǵy respýblıkalyq mańyzy bar avtojoldarda avtokóliktiń barlyq túrleri úshin qozǵalysqa shekteý engizildi. Qazir avtojoldardy kútip-ustaýǵa 648 tehnıka men1381 jol qyzmetkeri jumyldyryldy.
Veıp úshin 5 jylǵa sottalasyń!
Elimizde elektrondy temekilerdi tasymaldaýǵa, óndirýge jáne satýǵa tyıym salatyn zańdy búgin Májilis depýtattary ekinshi oqylymda maquldady
Zańda veıpterdi zańsyz aınalymǵa jibergeni úshin qylmystyq jaýapkershilik qarastyrylǵan:
veıp satqany úshin eń aýyr jaza - 50 táýlikke deıin qamaýǵa alý;
ákelý jáne taratý úshin – 2 jylǵa deıin bas bostandyǵynan aıyrý;
qylmystyq top jasaǵan ne asa iri mólsherde ne birneshe ret jasalǵan dál sol áreketter úshin - 5 jylǵa deıingi merzimge bas bostandyǵynan aıyrýǵa jazalanady.
UBT tapsyrýshylarǵa kálkýlátor men hımıalyq keste beriledi
Ulttyq biryńǵaı testileýdi elektrondy formatqa aýystyrǵannan keıin test tapsyrýshylarǵa kálkýlátor, hımıalyq elementterdiń perıodtyq júıesi jáne tuzdardyń erigishtik kestesi qoljetimdi boldy. Sonyń nátıjesinde olar testileý baǵdarlamasyna engizilgen. Ony testileý ákimshileri UBT tapsyratyn aýdıtorıada beretin bolady. Iaǵnı, testke qatysýshylar ózderimen birge alyp kelmeıdi. Osylaısha, talapkerler kestelerdiń elektrondyq formatyn da, qaǵaz formatyn da qoldana alady.
Sýarý maýsymyna daıyndyq bastaldy
Daıyndyq aıasynda topyraq quramyndaǵy ylǵal mólsherin arttyrý boıynsha is-sharalar júrgizilip jatyr. Búgingi tańda 12 myń gektarǵa nemese sýarmaly alqaptyń 25 paıyzynda ylǵaldatý jumysy júrgizildi. Al, Jetisaı aýdanynda ylǵaldatý josparlanǵan 54 myń gektardyń 10 myń gektaryna (19%) sý berildi.
Mınıstrdiń kózqarasyn aıqyndaǵan...
Balaeva BAQ-tyń rólin Almatyda bolǵan jer silkinisine baılanysty baǵalady.
«Mádenıet jáne aqparat mınıstrligi jaqyn arada tótenshe jaǵdaılar kezinde BAQ pen áleýmettik jeliler jumystarynyń egjeı-tegjeıli algorıtmin usynbaq. Sondaı-aq, biz Tótenshe jaǵdaılar mınıstrligi, Densaýlyq saqtaý mınıstrligi, Eńbek jáne halyqty áleýmettik qorǵaý mınıstrligi, İshki ister mınıstrligi jáne basqa da múddeli memlekettik organdar ókilderiniń qatysýymen BAQ qyzmetkerleri úshin birqatar oqý trenıńterin ótkizýdi josparlap otyrmyz. Trenıń aıasynda qatysýshylar tótenshe jaǵdaılarda, mıtıńilerde, órt kezinde, jazataıym oqıǵalar men balalardyń qatysýymen bolǵan faktilerdi jarıalaýǵa qatysty qajetti usynystar men nusqaýlardy ala alady. Buqaralyq aqparat quraldarynyń jumysy tek obektıvti jáne ýaqytyly aqparat taratý ǵana emes, keıde adamdardyń ómiri men densaýlyǵy úshin de jaýapty ekenin bilý mańyzdy», dep jazdy Aıda Balaeva óziniń Facebook paraqshasyna.