Qazir Nurjan Ábdirásilov shetelge shyǵýǵa daıyndyq ústinde.
Almatydaǵy respýblıkalyq fızıka-matematıka mektebin támamdap, IT salasyn jetik meńgergen 16 jastaǵy Nurjan Ábdirásilov óz tańdaýyn jasaǵan, dep habarlaıdy Almaty-akshamy.kz Habar 24 telearnasyna silteme jasap.
Matematıka men IT salasyna yntaly Nurjan jetim balalarǵa arnalǵan avtorlyq baǵdarlamalaý tilin ázirlegen. Endi jas túlek muhıt asyp, bilim almaq. Mektep tabaldyryǵyn attaǵan kúnnen bastap Nurjan Ábdirásilov oqýǵa degen yntasymen, kóshbasshylyq qasıetimen kózge túsken. Matematıka men IT salasynyń tylsymyna boılaǵan Nurjan qazaqstandyq jetim balalarǵa arnalǵan avtorlyq baǵdarlamalaý tilin ázirlegen. Osyndaı alǵyr balaǵa AQSH-tyń birneshe joǵarǵy oqý ornynan shaqyrtý túsken.
«Sonyń ishinde men US BERKLY degen ýnıversıtetti tańdadym. Ol Kalıfornıada ornalasqan. Bul - kóp dárejeli ýnıversıtet. Álemdik reıtıńte 4-orynda tur. Computer science, ıaǵnı baǵdarlamalaý salasynda ornalasqan», - dedi mektep túlegi Nurjan Ábdirásilov.
Matematıka men IT salasynan ártúrli olımpıadaǵa qatysqan zerek bala sportty da serik etken.
«Adamnyń sergek júrýine, oılaý qabiletine sporttyń tıgizer yqpaly kóp. Sondyqtan tek Nurjan emes, barlyq balamdy sportqa berdim. Sport degen balany ózin-ózi babynda uctap, aldyna maqsat qoıýyna yqpal etedi, árdaıym ózinen-ózi asyp túsý úshin jumys isteýge úıretip, minezdi damytady. Ózine degen ustanymy arta túsedi. Ol ómirde tek sportta emes, basqa salalarda qatty kómektesedi. Sondaı maqsatpen ony sportqa berdik. Endi júzýge de bardy. Negizi, bokspen aınalysady», - dedi Nurjannyń ákesi Ǵazız Ábdirásilov.
Qazir Nurjan shetelge shyǵýǵa daıyndyq ústinde. AQSH-ta oqýyn támamdaǵan soń sol jerde biraz tájirıbe jınap, Qazaqstanǵa kelip qyzmet etemin dep otyr.