Almaty-akshamy.kz saıtynda búgin jarıalanǵan jańalyqtarǵa sholý – kún kerýeni
Ult basylymy – shynaıy aqparat pen sapaly saraptamanyń qaınar kózi
Elimizde alǵash ret 2 aqpan – Ulttyq basylym kúni atap ótildi. Osyǵan oraı memleket basshysy baspasóz qyzmetkerlerin Ulttyq basylym kúnimen quttyqtady.
«Sonaý 1913 jyly, dál osy kúni elimizdiń baspasóz salasynyń bastaýynda turǵan «Qazaq» gazetiniń alǵashqy sany jaryq kórdi. Halqymyzdyń birtýar perzentteri – Alash arystary shyǵarǵan bul basylym syndarly sátterde ultty uıystyrýǵa aıryqsha yqpal etti. Sóz bostandyǵyna adaldyǵynan aınymaǵan basylymdar árdaıym shynaıy aqparattyń jáne sapaly saraptamanyń qaınar kózi bolyp qala beredi. Gazet-jýrnaldar zamana tynysyn dóp basyp, memleket pen qoǵamdaǵy qordalanǵan máselelerdi kóteredi, túrli kózqarastaǵy oı-pikirlerdi jaryqqa shyǵarady. Sondaı-aq jalpy adamzatqa ortaq izgi qundylyqtardy dáripteıdi. Baspasóz qyzmetkerleri kásibı biliktiliktiń, otanshyldyq pen jaýapkershiliktiń ozyq úlgisin kórsetip keledi», dedi Qasym-Jomart Kemeluly Toqaev.
Sımvoldyq máni bar mereke
Mádenıet jáne aqparat mınıstri Aıda Balaeva da qalam ustaǵan qaýymdy atalmysh merekemen quttyqtady.
«Qazaq baspasóziniń taǵylymǵa toly tarıhynda bul kúnniń mańyzy bólek. Sebebi dál osy kúni Álıhan Bókeıhanuly, Ahmet Baıtursynuly, Mirjaqyp Dýlatuly sekildi ult zıalylarynyń esimimen ushtasyp jatqan «Qazaq» gazetiniń alǵashqy sany jaryq kórdi. Sondyqtan, ótken jyly Úkimet qaýlysymen 2 aqpan – Ulttyq basylym kúni bolyp bekitilýiniń ózindik sımvoldyq máni bar dep bilemiz», dedi mınıstr quttyqtaýynda.
Bıylǵy esep boıynsha Qazaqstanda 5 804 BAQ tirkelgen, onyń 3 985 – i merzimdi baspasóz basylymy, 212-i telearna, 90-y radıo, 1 222-i aqparattyq agenttikter jáne jelilik basylymdar.
Qaltyraǵan Bishkek
Búgin túnde Bishkektegi jylý ortalyqtarynyń birinde apat bolǵan. Aldyn ala málimet boıynsha, qazandyqtardyń biri jarylǵan. Jarylys sebebi ázirge belgisiz. Qalanyń kóptegen turǵyny ystyq sýsyz qalǵan.
Balany basyp qalǵan...
4 búldirshin shkaftyń astynda qalyp qoıyp, jaraqat aldy. Oqıǵa Oraldaǵy balabaqshada bolǵan. "Sabi" jeke balabaqshasynda balalardyń ústine bıiktigi eki metrdeı shkaf qulap, 4 bala astynda qalyp qoıǵan. Balalardy qalqalaımyn dep aıaǵyn jaraqattaǵan 47 jastaǵy tárbıeshige ambýlatorıalyq em taǵaıyndaldy. Oqıǵanyń mán-jaıy anyqtalyp jatyr.
Jolaýshylardyń joly bolmaı tur
Sebebi, úsh oblystyń joly aýa raıynyń qolaısyzdyǵyna baılanysty jabylyp, 4 ýchaskede kólik qozǵalysyna shekteý engizildi. Joldardy kútip-ustaýǵa 893 arnaıy tehnıka men 1145 jolshy jumyldyryldy.
Polısıa eskertedi!
Almaty polısıasy qardyń qalyń jaýýyna baılanysty kólik júrgizýshilerine úndeý jasady.
Tártip saqshylary júrgizýshilerdi qaýipsizdik sharalaryn kúsheıtýge jol qozǵalysy erejelerin qatań saqtaýǵa, júrgizýshi mádenıetin kórsetýge shaqyrady.
Jarty ǵasyrdan keıin jaryq kórgen...
Áıgili halyq geology, ken bilgiri Qosym Pishenbaevtyń 180 jyldyǵyna arnalǵan «Qosymnyń taǵdyry» kitabynyń tusaýy kesildi. Kitaptyń avtory – baıanaýyldyq ólketanýshy Aleksandr Cherkashın. Kitaptyń qoljazbasy 1972 jyly Baıanaýyl kentinde baspa mashınkasyna túsirilgen. Bul kitaptyń jazylýyna akademık Qanysh Imantaıuly Sátbaev túrtki bolǵan. Qoljazba kúıinde QazKSR Jazýshylar odaǵynyń kórkemdik keńesine jiberilip, belgili sebeptermen keıin qaıtarylǵan.
Adamdy chıp basqara ma?
Ilon Masktyń Neuralink kompanıasy adamnyń mıyna tuńǵysh ret ımplant ornatty. Chıp ornatý operasıasy sátti ótken. Masktyń jazýynsha, ornatylǵan chıp jaqsy nátıje kórsetip jatyr.
Chıptiń kómegimen múmkindigi shekteýli azamattar kompúter nemese smartfondy oımen basqara alady. Buǵan qosa, ımplant aıaq pen qol protezin basqarýǵa da kómektespek.
«Áıelderdi erkekterden kóp deıdi...»
Joǵary sot keńesiniń tóraǵasy Denıs Shıpptiń aıtýynsha, názik jandy sýdıalardyń sany erlermen salystyrǵanda kóbirek eken. Prezıdent qabyldaýynda bolǵan tóraǵa sýdıalar korpýsynyń qazirgi jaı-kúıi jáne aldaǵy kezeńge arnalǵan jospary jóninde baıandaldy.
«Genderlik turǵydan áıel sýdıalardyń sany er adamdarmen salystyrǵanda 172 adamǵa kóp. Sýdıalardyń ortasha jas mólsheri – 46 jas, al eńbek ótili – 13 jyl», dedi tóraǵa.
iPhone-nyń ne jazyǵy bar?
Alma belgisi bar telefon ıeleri nelikten jer silkinisi týraly habarlama almady? Muny túsindirgen Qyrǵyz Respýblıkasy Mınıstrler kabıneti tóraǵasynyń birinshi orynbasary Adylbek Qasymalıevtiń aıtýynsha, Apple bizdiń elderdi apatty eskertý qyzmetine qoljetimdi elder tizimine qospaǵan.
«Bul qarapaıym fýnksıa sıaqty kórinedi, biraq ol adamdardyń ómirin saqtap qalýy múmkin. EAEO elderine eń aldymen Apple, Google jáne Microsoft sıaqty tehnologıalyq kompanıalarmen dıalog qajet», dedi Adylbek Qasymalıev.