Almatyda jan-jaqty josparlaýdyń jańa jobalaryna sáıkes bazarlar aýmaqtary kógaldandyrylady
Qalalyq josparlaý jáne ýrbanıstıka basqarmasy atap ótkendeı, jan-jaqty josparlaýdyń jańa jobalary boıynsha saýda keńistikterin aıtarlyqtaı jańartý qarastyrylǵan.
Mysaly, Almaly aýdanynda Rozybakıev kóshesiniń boıyndaǵy «Tastaq» jáne «Kóterme saýda» bazarlary modernızasıalanady. Jetisý aýdanynda Soltústik aınalma joly boıyndaǵy bazarlardy jańǵyrtý, sondaı-aq sý qorǵaý beldeýlerin abattandyrý jáne tazartý kózdelgen. Bul sharalar saýda alańdarynyń sapasyn edáýir arttyrady jáne kelýshiler men kásipkerler úshin qolaıly jaǵdaı jasaıdy.
Jalpy, saıabaqtardy, skverlerdi, býlvarlardy qosa alǵanda, jalpy paıdalanymdaǵy jasyl jelekter alańyn 2030 jylǵa deıin 3 ese ulǵaıtý kózdelgen.
Sonymen qatar, júrdek kólik qańqasyn jáne ózara baılanysty kósheler jelisin engizý esebinen qalanyń barlyq aýdandary bir-birine ıntegrasıalanatyn bolady. Qala turǵyndary qalanyń kez kelgen jerine ońaı bara alady. Mundaı qozǵalystardyń dálizderi bıznes úshin, onyń ishinde saýda salasynda da tartymdy bolady.
Osylaısha, jan-jaqty josparlaý jobalary turaqty jáne fýnksıonaldy qalalyq keńistikti qurýǵa baǵyttalǵan. Olar qala qurylysyn aımaqtarǵa bólýdiń, qyzyl syzyqtardyń, halyqqa áleýmettik, mádenı jáne komýnaldyq qyzmet kórsetý obektilerin ornalastyrý úshin aýmaqtardy rezervteýdiń, kóshe-jol jelisin uıymdastyrýdyń, ınjenerlik komýnıkasıalardy trassalaýdyń, aýmaqtardy abattandyrý men kógaldandyrýdyń negizgi baǵyttaryn belgileıdi.