Erbolat Dosaev Digital Almaty forýmynda qazaqstandyq jáne álemdik IT kompanıalardyń ınovasıalyq startaptarymen tanysty
Almaty qalasynyń ákimi Erbolat Dosaev «Digital Almaty 2024: Indýstrıa H – bolashaqtyń sıfrlyq evolúsıasy» halyqaralyq sıfrlyq forýmyna qatysyp, iri elderdiń tehnoparkter kórmesin aralap, qazaqstandyq jáne álemdik tehnologıalyq kompanıalardyń úzdik ınovasıalyq startaptarymen tanysty.
Megapolıs basshysy ónerkásiptegi sıfrlyq transformasıanyń jańa ónimderimen jáne GovTech, ındýstrıa 4.0, ESG, Smart City salalaryndaǵy ınovasıalyq sheshimdermen tanysty.
Almaty Ortalyq Azıanyń sıfrlyq haby retinde dástúrli túrde forým ótkizetin alańǵa aınaldy. Bıyl 15 elden 200-den astam halyqaralyq sarapshy paneldik sesıalarǵa qatysyp, ekonomıkanyń naqty sektorynda jańa tehnologıalardy qoldanýdaǵy oń tájirıbesin bólisip jatyr.
Aıta keteıik, Qazaqstannyń IT kompanıalarynyń 1/3 bóligi Almatyda ornalasqan, onda 70 myńnan astam maman eńbek etedi. Almatyda ornalasqan Alataý ınovasıalyq tehnologıalar parki rezıdentteriniń ıdeıalary búginde álemniń 50-den astam elinde telekomýnıkasıalarda, radıoelektronıkada qoldanylady. Qalalyq İT ekojúıeni damytý baǵdarlamasynyń arqasynda irikteý jáne akselerasıa baǵdarlamalary arqyly 400-den astam startap ótti, onyń 8-i sheteldik naryqqa shyǵaryldy, al ınvestısıalar 8,4 mln dollardan asty.
Megapolıste Almaty-Smart City tujyrymdamasy iske asyrylyp jatyr, ol azamattarǵa arnalǵan sıfrlyq servısterdi qurý, qaýipsizdikti qamtamasyz etý, basqarý sheshimderin qabyldaý tıimdiligin jaqsartý jáne ınjenerlik ınfraqurylymdy sıfrlandyrý jónindegi jobalardy qamtıdy. Almaty-Smart City-di damytýdyń zákirlik jobasy qalanyń sıfrlyq egizi (Digital Twin) bolyp tabylady, ol neǵurlym aqyldy ári tıimdi qalalyq keńistik qurý úshin qalalyq ınfraqurylymdy modeldeýde, taldaýda jáne basqarýda negizgi qural bolady. Megapolıste 2022 jyldyń tamyzynan bastap Almatynyń biryńǵaı beınemonıtorıng júıesi jumys isteıdi, oǵan zamanaýı beınetaldaý servısteri kiredi, 30 myńnan astam kameranyń deregin taldaıdy. Bıyl jyl sońyna qaraı kamera sany 50 myń beınekameraǵa jetkiziledi, 2030 jylǵa qaraı 100 000 kamerany qosý josparlanyp otyr.
Buǵan qosa, byltyr elimizde tuńǵysh ret Almatyda barlyq memlekettik mektep men balabaqshada keshendi qaýipsizdik júıeleri engizildi. Qaýipsizdik júıesi 4 quramnan turady: beınebaqylaýdyń sıarlyq kameralary, dabyl túımeleri, órt qaýipsizdigi júıeleri, Face ID bar týrnıketter. 2024 jyldyń sońyna qaraı qaladaǵy barlyq memlekettik densaýlyq saqtaý nysany qamtylady.
Esterińizge sala keteıik, forým aıasyndaǵy el tehnoparkteri, halyqaralyq vendorlar men venchýrlyq qorlar kórmesi – bul ozyq ınvestısıalyq tujyrymdamalardy usyný úshin Ortalyq Azıadaǵy eń iri digital is-shara, túrli elderdiń ınovasıasy men tehnologıalyq serpinderiniń kezdesý orny. Bıylǵy kórmege qatysýshylardyń arasynda iri qazaqstandyq jer qoınaýyn paıdalanýshylar, tehnoparkter men ónerkásiptik kompanıalar bar.