Baıanda oınaıtyn qazaqstandyq 11 jastaǵy Radmır Haıbýllın. Fransıada ótken «Álem trofeıi» baıqaýynda bas júldege ıe boldy, dep habarlaıdy «Habar 24».
Dúnıejúzilik baıanshylar men akordeonshylar konfederasıasy baıqaýdy 1951 jyldan beri uıymdastyryp kele jatyr. Radmır bul saıysqa qashyqtan qatysý ońaıǵa túspegenin aıtady.
Ustazy Rýslan Turaev osydan 6 jyl buryn Semeıde qyzmet etip júrgende balaqaıdy qabyldap alǵan edi. Keıin qyzmet babymen Astanaǵa aýysqan soń, Radmırdiń ata-anasy balanyń bolashaǵy úshin bas shaharǵa kóshýge sheshim qabyldady. Búginde jas daryn tálimgeri sabaq beretin Qazaq ulttyq óner ýnıversıteti janyndaǵy mýzykalyq mektepte oqyp jatyr.
- Meniń atam birneshe mýzyka aspabynda oınaıtyn. Biraq kóbine syrnaı tartqandy jaqsy kóretin. Sol sebepti ata-anam meni syrnaı klasyna jazdyrmaq boldy. Biraq Semeıdegi mýzykalyq mektepte syrnaı klasy bolmady. Sosyn Rýslan Aleksandruly men úshin ádeıi syrnaı sabaǵyn alyp, ózi meńgerip, keıin meni úırete bastady. Al Astanaǵa kóshken soń baıanǵa aýystym, - deıdi Radmır Haıbýllın