Almatyda Ulttyq ulannyń áskerı qyzmetshileri Jeńistiń 80 jyldyǵy qarsańynda 101 jastaǵy maıdanger, otstavkadaǵy polkovnık Qambar Sársenovtiń shańyraǵyna baryp, ardagerdi mereıli merekesimen quttyqtady.
Keńes Odaǵynyń Batyry, gvardıa polkovnıgi Baýyrjan Momyshuly atyndaǵy 5571 áskerı bóliminiń komandıri polkovnık Maqsat Baımaǵulov bastaǵan ulandyqtar jáne Ardagerler keńesiniń tóraǵasy zapastaǵy maıor Berik Almaǵambetov Qambar Sársenovke kóptiń atynan qurmet kórsetti. Jınalǵan qaýym maıdangerdiń ǵıbratty ǵumyryn aıryqsha atap ótti.
Ór rýhty maıdangerdiń terezesi astynda áskerı orkestr aty ańyzǵa aınalǵan «Jeńis kúni», «Slavánmen qoshtasý» marshtaryn, sondaı-aq «Smýglánka» jáne «Katúsha» kompozısıalaryn oryndady. Ulandyqtar sondaı-aq batyr ardagerdiń úıiniń aldynan saltanatty sherýmen júrip ótti.
Qambar Ámiruly áskerge 1942 jyly tamyzda shaqyryldy. Ol soǵys jyldary úsh ret jaralandy. Kalının oblysyn, Belorýssıany, Latvıany, Lıtvany, Polshany azat etýge qatysty. Shyǵys Prýssıa men Germanıa jerinde soǵysty. Kenısbergte jaralanýyna baılanysty demobılızasıalandy.
Búginde keýdesinde I jáne II dárejeli Uly Otan soǵysy, II jáne III dárejeli «Dańq», «Qyzyl Juldyz», «Jaýyngerlik eńbegi úshin», «Kenısbergti alǵany úshin», «Germanıany jeńgeni úshin» orden-medaldary jarqyrap tur.
İİM júıesinde 33 jyl jumys istep, zeınetke shyqty. Búginde Qambar Ámiruly – QR İİM, Medeý aýdandyq ardagerler keńesiniń jáne energetıka júıesiniń qurmetti ardageri.
– Búgin biz Uly Otan soǵysynyń ardageri Qambar Sársenov aqsaqalǵa sálem bere keldik, alda kele jatqan úlken merekemen quttyqtadyq. Jyl saıyn ardagerlerge qurmet kórsetý bizdiń dástúrimizge aınaldy. Biz olardyń erligin úlgi etip, óskeleń urpaqty tárbıeleımiz. Ókinishke oraı, ardagerler qatary sırep barady. Sondyqtan biz árqashan olardy nazardan tys qaldyrmaı, qamqorlyq tanytyp kóńilderin aýlaýǵa tyrysamyz, – dedi áskerı bólim komandıri polkovnık Maqsat Baımaǵulov.