27 naýryz - álemde dúnıejúzilik teatr kúni
Ómirdiń ózi sahnada jandy sýret bolyp óriletin teatr - ónerdiń bıik shyńy.
Bul týraly aqshamnews.kz Egemen.kz-ke silteme jasaı otyryp habarlaıdy.
Qazaq dalasyndaǵy kásibı ult teatrynyń esigi sol kezeńde el astanasy bolyp turǵan Qyzylordada 1926 jyly ashyldy. Teatr ujymy kórermenmen alǵash ret Qoshke Kemeńgerdiń «Altyn saqa» qoıylymy arqyly qaýyshty.
1928 jyly astana Almatyǵa aýysýymen teatrda Alataý baýraıyna qonys aýdaryp, 1937 jyldan bastap akademıalyq teatr ataǵyn aldy, al 1961 jyldan bastap M.Áýezovtiń esemin ıelendi.
Mine, sodan bergi júz jylǵa jýyq ýaqytta qazaq dalasynda teatr túlep, teatr mádenıeti órken jaıdy. Búginde memlekettik teatrlarmen qatar táýelsiz teatrlardyń týyp, jańa izdenis, jańa sheshim, tyń qoıylymdarymen ónersúıer qaýymdy qýantyp jatqany baıqalady. Keıingi jyldardaǵy kóptiń kóńiliniń teatr tolǵamdaryn erekshe talǵammen uǵyp, izdep turatyndardyń qatarynyń qalyńdap jatqanyn Býrabaıda ótken Ulttyq quryltaıda Prezıdent Qasym-Jomart Toqaev: «Qazaqstanda teatr ónerine qyzyǵýshylyq artyp keledi. Zal kórermenge toly, qoıylymdardyń premerasyna bıletter eki-úsh apta buryn satylyp ketedi. Sahna ónerine qushtar jandardyń arasynda jastardyń kóp bolýy kóńilge erekshe qýanysh uıalatady», dep atap ótken bolatyn.
Jalpy tarlan óner týraly kókirek kózi oıaý daryn ıeleri dara oı oramdaryn destelegen. Solardyń bir parasyn nazaryńyzǵa usynbaqpyz:
Teatr - symbatty ónerdiń ishindegi eń zor ónerdiń biri. M.Áýezov
Teatr – has sulýdyń kóz jasyndaı móldir óner. Ǵ.Músirepov
Teatr – adamnyń ózin-ózi sahnadan kórip, ózin-ózi túsinetin oryn. Sh.Aımanov
Teatr - kúrdeli ıntellektýaldyq garmonıadan turatyn, úsh jaqtan birdeı qıynnan qıysqan sahnalyq óner. S. Áshimbaev
Teatr - meniń qasıetti qaǵbam. T.Jamanqulov
Mádenıet maıdanyndaǵy súbeli isimizdiń biri — teatr. Teatr kóringenniń ermegi emes, eńbek. Eńbektiń kórkemi. Teatr — kóńil kóterýdiń ǵana orny emes, mádenı oshaq. Óner orny, eńbekshiler ústemdiginiń mádenıet maıdanyndaǵy qarmaýly orynnyń biri.
İ. Jansúgirov
Teatr daıyn dramatýrgıany qoıyp berý emes, ondaǵy oqıǵalardyń nege olaı bolǵany jaıynda oılaný. T. Sýdzýkı
Teatr – ómirlik suraqtarǵa sheshim tabatyn joǵarǵy ıntensıa. A. Gersen