Бұл туралы Қаржы нарығын реттеу және дамыту агенттігінің (ҚНРДА) төрайымы Мәдина Әбілқасымова айтты.
Қазақстанда үш ай ішінде 110 адам микроқаржы ұйымдары (МҚҰ) арқылы несиелік алаяқтықтың құрбаны болды, деп хабарлайды Almaty-akshamy.kz
«2021 жылғы 22 қазаннан бастап 2022 жылғы 21 қаңтарға дейінгі кезеңде 25 МҚҰ-ның атына жеке тұлғалардан жалпы сомасы 7,8 млн теңгеге үшінші тұлғалардың алаяқтық тәсілмен микрокредиттер ресімдеуі туралы 110 өтініш келіп түсті, жоғарыда келтірілген фактілер бойынша мәліметтер құқық қорғау органдарына жіберілді», - деп хабарлады Әбілқасымова Мәжіліс депутаттарының сауалына жауап бере отырып.
Оның айтуынша, МҚҰ азаматтардың 110 өтініші бойынша келесі шараларды қабылдады:
- 81 өтініш бойынша 5,6 млн теңге сомасына берешек есептен шығарылды және бір мезгілде кредиттік тарихқа түзету жүргізілді;
- қалған 29 өтініш бойынша сыйақы есептеу және талап-арыз жұмысы тоқтатылды.
«Құқық қорғау және (немесе) сот органдарынан алаяқтық фактісін растайтын іс жүргізу құжатын алғаннан кейін микрокредиттерді есептен шығару және кредиттік тарихты түзету бойынша іс-шаралар жүргізілетін болады», - деп нақтылады ҚНРДА басшысы.
Сондай-ақ, ол аталған кезеңде МҚҰ-ның атына құқық қорғау органдарынан бес МҚҰ-да жалпы сомасы 828 мың теңге болатын 24 шағын несиені үшінші тұлғалардың ресімдеуі туралы ақпарат келіп түскенін айтты.
«МҚҰ 24 факт бойынша мынадай шаралар қабылдады: екі факт бойынша 150 мың теңге сомаға микрокредиттер есептен шығарылды және азаматтардың кредиттік тарихы түзетілді; 678 мың теңге сомаға 22 факт бойынша сыйақы есептеу тоқтатылды, микрокредиттер есептен шығарылады. Осылайша, меморандумды іске асыру аясында интернет-алаяқтық фактілерін жою бойынша жедел және тиімді әрекет ету жүзеге асырылады», - деп сендірді Әбілқасымова.