Ақмола облысында 45 жастағы ер адам гипотермиядан қайтыс болды, деп хабарлайды Aqshamnews.kz тілшісі өңірлік ТЖД баспасөз қызметіне сілтеме жасап.
Оқиғаның мән-жайы
ҚР ТЖМ жедел-құтқару жасағы Қайранкөл көлінде авариялық-құтқару жұмыстарын жүргізді. Моторлы қайықпен балық аулауға шыққан 45 жастағы ер адам белгісіз себеппен суға құлап, өздігінен жағаға жете алмаған.
Хабар түскен бойда құтқарушылар оқиға орнына жедел жетіп, зардап шеккен адамды судан шығарып, жағаға жеткізді.
"Оған алғашқы медициналық көмек көрсетілді, кейін медицина қызметкерлеріне тапсырылды. Алайда кейінгі ақпарат бойынша, ер адам үсік салдарынан көз жұмды", - делінген ТЖД хабарламасында.
ТЖМ ескертуі
Министрлік су айдындарына шығар алдында жүзу құралдарының техникалық жай-күйін мұқият тексеруді, байланыс құралдарын және құтқару кеудешелерін өзіңізбен бірге алып жүруді еске салады.
