12 қазан күні Алматы қаласы әкімдігінің қолдауымен Алматы Студенттер Лигасының жаңа маусымы басталды. Лига үш спорт түрін қамтиды – футбол 11х11, волейбол және баскетбол. Жарысқа қаладағы 35 жоғары оқу орнынан 108 команда қатысуда, - деп хабарлайды Аqshamnews.kz тілшісі.
Футбол чемпионаты Қазақстан Футбол Федерациясының қолдауымен өтеді, ал лига жеңімпаздарына ЖОО арасындағы республикалық турнирге жолдама беріледі.
Барлық спорт түрлері бойынша қатысу толығымен тегін, ұйымдастырушылық жарналар талап етілмейді.
2025 жылғы көктемгі іріктеу лигасының (сәуір–мамыр) қорытындысы бойынша командалар спорттық дайындық деңгейіне қарай екі дивизионға бөлінді. 2025–2026 маусымы айналым жүйесімен өтеді – әр команда өз дивизионында барлық қарсыластармен кездеседі.
Чемпионат екі кезеңге бөлінген:
Күзгі кезең – 2025 ж. қазан–желтоқсан айлары;
Көктемгі кезең – 2026 ж. ақпан–мамыр айлары.
Жеңімпаздар мен жүлдегерлер екі кезеңнің нәтижесі бойынша жинаған ұпай санына қарай анықталады.
Жарысты ұйымдастыру және үйлестіру үшін сандық платформалар қолданылады:
asvl.kz — волейбол
asfl.kz — футбол
asbl.kz — баскетбол
Бұл жүйелер командаларға онлайн тіркелуге, жарыс кестесін құруға, құрамдар мен турнир кестесін бақылауға, сондай-ақ нақты уақыт режимінде статистиканы жүргізуге мүмкіндік береді.
Матчтардың өту барысын салалық спорт федерацияларының төрешілері қамтамасыз етеді, сондай-ақ ережелердің сақталуын бақылайтын Тәртіптік комитет жұмыс істейді.
Барлық ойындар YouTube арнасында тікелей эфирде көрсетіледі: youtube.com/@asl-2025.
Алматы Студенттер Лигасының құрылуы – бұл жастар арасында бұқаралық спортты дамытуға, жоғары оқу орындары арасындағы бірлікті нығайтуға және салауатты өмір салтын насихаттауға бағытталған жүйелі қадам.