Қазақстанның Энергетика министрлігі автобустарда жол ақы тарифін қымбаттатуды ұсынған сарапшы Олжас Байділдиновтың пікіріне байланысты мәлімдеме жасады, - деп хабарлайды Аqshamnews.kz тілшісі.
"Жолақы 500 теңге болуға тиіс"
Сарапшы өз Telegram-арнасында тасымалдаушыларға берілетін мемлекеттік субсидиялар туралы ой қозғады.
"Астанада және Алматыда жолақы 500 теңге болуға тиіс (мәслихат сессияларында бұған дейін 450 теңге деген нақты емес баға аталған). Тек Алматының өзінде өткен жылы автобус тасымалдарын субсидиялауға 200 млн доллар бөлінді. Қызмет сапасын көріп отырсыздар ма? Бұл салада нарықтық бағалар мен ашық бәсеке қажет. Пайдаланушылар қашықтыққа байланысты әртүрлі баға төлеуге тиіс. Нарыққа жат әрі ашық емес субсидияларды автобус парктерінен алып, бағаларды нарыққа жіберуді ұсынамын", – деп жазды Байділдинов.
Энергетика министрлігі не дейді?
Байділдиновтың жазбасы бірқатар БАҚ-та тарап, жұрттың наразылығын тудырды.
Ол кейбір ақпараттарда Энергетика министрлігі жанындағы Қоғамдық кеңестің мүшесі ретінде көрсетілген. Осыған байланысты ведомство мәлімдеме жасады.
"Олжас Байділдинов ҚР Энергетика министрлігі жанындағы Қоғамдық кеңестің мүшесі емес. Оның қоғамдық көлік қызметтері тарифтерін қалыптастыру мәселелері бойынша айтқан пікірлері жеке көзқарасы және Қазақстан Республикасының мемлекеттік органдарының ресми ұстанымын білдірмейді", – деп мәлімдеді министрлік.
Ведомство қоғамдық көлік қызметтері тарифтерін қалыптастырумен Энергетика министрлігі емес, әкімдіктер айналысатынын еске салды.
Олжас Байділдинов туралы не белгілі?
Сенат сайтындағы мәлімет бойынша, Байділдинов - Аlmex Рolymer ЖШС-нің бас директоры.
2020 жылы қоғам қайраткері Олжас Байділдинов «Адалдық Алаңының» жобалық кеңсесінің жетекшісі - ҚР Энергетика министрінің штаттан тыс кеңесшісі болып тағайындалды.
Ал Энергетика министрлігінің мәліметінше, Олжас Байділдиновтің Энергетика министрлігінің құрылымдарында, «ҚазМұнайГаз» ұлттық компаниясында, банк саласында тәжірибесі бар, мұнай сервисі саласында өзінің бизнесін дамытумен айналысқан, 2016 жылдан бастап Atameken Business телеарнасында «Байдильдинов. Нефть» салалық авторлық бағдарламасын жүргізеді, әр түрлі бұқаралық ақпарат құралдарында қазақстандық мұнай-газ секторының дамуы туралы талдамалық материалдар жариялайды.
Олжас Байділденов Instagram-дағы парақшасында өзін Алмэкс Жобасының басшысы, Самұрық-Қазына қоғамдық кеңесінің, Сенат жанындағы сарапшылар клубының, Бәсекелестікті қорғау және дамыту агенттігі кеңесінің мүшесі мүшесі ретінде таныстырған. Қазір оның инстадағы парақшасы жабық тұр.
Еске салайық, 2022 жылғы Қаңтар оқиғасы кезінде Байділденов газ бағасын өсіруді талап еткен еді. Қымбатшылыққа наразылық білдірген халыққа сарапшы автобуспен жүруге кеңес берген.
