Әлеуметтік желіде Алматыда бірнеше адамның 18 жастағы жігітті ұрып-соққаны түсірілген видео тарады, - деп хабарлайды Аqshamnews.kz тілшісі.
Не болды?
Анасының жазуынша, 18 жастағы ұлын 11-інен 12 қазанға қараған түні Төле би көшесіндегі кафе жанында мас ер адамдар топ болып ұрып-соққан.
"Олардың бірі ес-түссіз жатқан баламды басынан тепкен. 15–20 күдіктінің ішінен тек үшеуі ғана ұсталды деген ақпарат бар. Барлығы ұсталып, заңға сәйкес жауапқа тартылсын", - деп жазды ол.
Полицияның ресми түсіндірмесі
Алматы қалалық Полиция департаментінің баспасөз қызметі қасақана денсаулыққа зиян келтіру фактісі бойынша қылмыстық іс қозғалғанын хабарлады.
"Жедел іс-шаралардың нәтижесінде оқиғаға қатысқандардың барлығы анықталып, ұсталды. Әрқайсысының кінәсінің дәрежесін және оқиғаның объективті мән-жайын анықтауға бағытталған тергеу амалдары жүргізілуде", - деп мәлімдеді полиция.
Ведомство барлық кінәлілер заңға сәйкес жауапқа тартылатынын, әр қатысушының әрекетіне қағидатты құқықтық баға берілетінін атап өтті. Тергеу барысы Алматы қалалық ПД басшылығының ерекше бақылауында.
