Түркістан облысында Алматы – Шымкент тасжолының 667-шақырымында той кортежі жүргізушілері жол ережесін өрескел бұзғаны үшін жауапқа тартылды, деп хабарлайды Aqshamnews.kz Polisia.kz дерегіне сілтеме жасап.
Полиция интернет-ресурстарды мониторингтеу кезінде бірнеше той көлігінің жүргізушілері жолда "жылан жолын" жасап жүріп, өзге көлік қозғалысына кедергі келтіргенін анықтаған. Барлық құқықбұзушылар бірдей анықталып, әкімшілік жауапкершілікке тартылды, ал олардың көліктері арнайы тұраққа қойылды. Іс-шара ұйымдастырушысына профилактикалық түсіндіру жұмысы жүргізілді.
Бұған дейін де мерекелік кортеждердің қатысуымен түрлі құқықбұзушылықтар тіркелгені хабарланған. Мәселен, Екібастұзда 6 автокөліктен құралған той кортежіне қатысты түрлі баптар бойынша 15 әкімшілік хаттама толтырылған.
Ал Шымкентте түнде тасжолда қарсы бағытқа шығу, артқа жүріп қозғалу, терезеден еңкею секілді қауіпті әрекеттер жасағандар да жазаланған. Сондай-ақ оқу жылының соңында БАКАД трассасында бітіруші түлектердің кортежі жол қозғалысын бұзып, апаттық жағдай тудырғаны үшін полиция назарына іліккен еді.
Полиция қоғамдық тәртіп пен жол қауіпсіздігін сақтауды, кортеж кезінде де жол жүру ережелерін қатаң орындауды ескертеді.
