Қазақстанда түнгі көңіл көтеру орындарында спирттік ішімдіктерді сату уақытын шектеу және олардың саудасына қосымша бақылау шараларын енгізу ұсынылды, деп хабарлайды Aqshamnews.kz тілшісі ІІМ басшысы Ержан Сәденовтің бастамасына сілтеме жасап.
Министрдің айтуынша, жыл сайын мас күйдегі адамдардың қатысуымен 10 мыңға жуық қылмыс жасалады.
"Біз профилактикалық шаралар қабылдап жүрміз: мас күйінде ішімдік ішу фактілерінің жолын кесеміз, қоғамдық орындардан мас адамдарды оқшаулаймыз, есептегі азаматтарға алкоголь тұтынуға тыйым саламыз. Алайда бұл салдармен күрес қана", - деді Сәденов дүйсенбі күні ІІМ-де өткен Мәжілістің көшпелі үкіметтік сағатында.
Ол полицейлардың өкілеттігі көбіне мәжбүрлеу шараларымен шектелетінін атап өтті.
"Пайда үшін кей кәсіпкерлер спирттік ішімдіктерді сату бойынша жас шектеулерін және уақыт режимін бұзады, кафе-бар бүркеншігімен тәулік бойы саудалайды, онлайн жеткізуді белсенді қолданады. Бұл ретте лицензиядан айыру шарасы тиімсіз: келесі күні басқа тұлғаларға рәсімдеп алады", - деп түсіндірді министр.
ІІМ әзірлеген ұсыныстар ведомствоаралық комиссия отырысында қаралған. Атап айтқанда, мынадай шаралар ұсынылады:
- Алкогольді бөлшек сауданы тек мамандандырылған дүкендерде алкомаркеттерде ғана рұқсат ету;
- Лицензия беру талаптарын қатаңдату, соның ішінде оларды лимиттеу;
- Алкогольдің онлайн-саудасына толықтай тыйым салу.
Бұған қоса, ведомство ойын-сауық орындарында спирттік ішімдіктерді сату уақытын шектеуді қажет деп санайды.
"Мұндай орындарда мас күйінде 1 400-ден астам қылмыс жасалды, оның ішінде үш кісі өлімі бар. Дегенмен, бүгін кей мемлекеттік органдар бұл тәсілдерді қолдамайды. Меніңше, ең алдымен азаматтарымыздың өмірі мен денсаулығын сақтаудың мүддесі басым болуға тиіс", - деп түйіндеді Ержан Сәденов.
