قاراپايىم اۋىلدان شىققان قازاقستاندىق اقش-قا قونىس اۋدارىپ، جاڭا ءومىر باستادى. جاقىندا ول جەلىدە اتا-اناسىن دا جانىنا كوشىرىپ العانىن ءبولىستى. باتىل شەشىمنەن قورىقپاعان ازامات كىم جانە ونىڭ بۇل قادامىنا نە تۇرتكى بولدى؟ اqshamnews.kz ءتىلشىسى ارەكەتىمەن كوپتى تاڭعالدىرعان جاسۇلانمەن تىلدەستى.
وسكەمەننەن نيۋ-يورككە جاسالعان قادام
جاسۇلان - وسكەمەن قالاسىنىڭ تۋماسى. ول ەلدەگى بەلگىلى ءبىر كومپانيادا ەكونوميست بولىپ قىزمەت ىستەگەن. جاسۇلان نيۋ-يورككە نەلىكتەن كوشىپ كەتكەنى تۋرالى اڭگىمەلەپ بەردى.
"قىزمەت ىستەگەن كومپانيامدا مەنىڭ ورنىما جاڭادان كەلگەن ماماندى جۇمىسقا الىندى. مەن سول ساتتە بۇل كومپانيادا ادال ەڭبەك پەن ءبىلىمنىڭ ەمەس، تانىستىڭ ءرولى ماڭىزدىراق ەكەنىن ۇقتىم. بۇل مەن ءۇشىن جاڭا شەشىم قابىلداۋ كەرەك دەگەن بەلگى بولدى. جۇمىس ورنىمنان ايىرىلعان سوڭ بىرنەشە نۇسقالاردى قاراستىرىپ، اقش-قا كوشۋدى ءجون كوردىم. ءومىردى جاڭادان باستاپ، ءتىل ۇيرەنىپ، جەرگىلىكتى ءومىردى زەرتتەدىم. مۇندا ءبارى باسقاشا ەكەنىن ءتۇسىنىپ، قالۋدى شەشتىم"،- دەيدى ول.
جاسۇلاننىڭ جاڭا ءومىرى: اۋىلداعى اتا-اناسى اقش-قا قالاي كوشتى؟
نيۋ-يوركتە جاڭادان باستالعان تىرشىلىك جاسۇلانعا وڭايعا سوقپادى. سەبەبى ول قادامىن ەڭ اۋەلى ءتىل ۇيرەنۋدەن باستاعان.
"امەريكاعا العاش كەلگەندە، ارينە، وڭاي بولعان جوق. ءتىل، مادەنيەت، ادامداردىڭ ويلاۋى - ءبارى باسقا. ءبىراق ۋاقىت وتە كەلە ۇيرەنىپ كەتتىم. ءقازىر اعىلشىن ءتىلىن ۇيرەنىپ ءجۇرمىن، جاي جۇمىس تابۋ ءۇشىن ەمەس، بولاشاقتا ءوز ءىسىمدى اشۋ ءۇشىن. سونىمەن قاتار، مۇنداعى زاڭدار مەن جۇيەنى دە زەرتتەپ ءجۇرمىن"، - دەيدى جاسۇلان.
ءقازىر ول بارمەن بولىپ جۇمىس ىستەيدى جانە قىركۇيەكتە اۋىلداعى اتا-اناسىن جانىنا كوشىرىپ الدى.
"جۇمىسىم ادامدارمەن تىكەلەي سويلەسۋگە، ەنەرگيا الۋعا مۇمكىندىك بەرەدى. جالاقىم جاقسى، ءوزىمدى دە، اتا-انامدى دا قامتاماسىز ەتە الامىن. اتا-انامنىڭ جانىمدا بولۋى - مەن ءۇشىن ۇلكەن قۋانىش. ءقازىر ولار دا ۇيرەنىپ كەلەدى، جاڭا ومىرگە بەيىمدەلىپ جاتىر. ەلدەن الىس جۇرگەنىمىزبەن، مادەنيەت پەن ۇلتقا دەگەن ماحابباتىمىز قاشان دا جۇرەگىمىزدە. انام ءجيى بەشبارماق ازىرلەپ، نيۋ-يوركتەگى قازاق دوستارىمىزبەن ءجيى ارالاسىپ تۇرامىز"، - دەپ قوستى ول.
"امەريكادا مەنى ۇستاپ تۇرعان نارسە..."
جاسۇلان اقش-تاعى ءومىر نەسىمەن ۇناعانىن جانە ەميگراسيانىڭ ونىڭ ومىرلىك كوزقاراسىنا قالاي اسەر ەتكەنىن ءبولىستى.
"امەريكادا مەنى ۇستاپ تۇرعان نارسە - تاڭداۋ ەركىندىگى. مۇندا كىم بولعىڭ كەلسە، سوعان اينالۋعا مۇمكىندىك بار. ەڭ باستىسى - ەڭبەكتەنۋ. ەميگراسيا مەنىڭ ومىرگە دەگەن كوزقاراسىمدى قاتتى وزگەرتتى. ءقازىر ءبارىن باسقاشا باعالايسىڭ - ەركىندىك، ۋاقىت، ادامدار"، - دەيدى قازاقستاندىق.
سونىمەن قاتار، جاسۇلان ەلدەگى جاستارعا ەشتەڭەدەن قورىقپاۋ كەرەگىن، كەلەشەككە، وزىڭە سەنۋ قاجەتىن ايتتى.
"قازاقستانداعى جاستارعا ايتاتىنىم - قورىقپاڭدار. ارمانداۋدان، سىناۋدان قورىقپاڭدار. الەم كەڭ، مۇمكىندىك كوپ. تەك وزدەرىڭە سەنىڭدەر. ەشكىم سەنىڭ ءومىرىڭدى سەن ءۇشىن جاقسارتپايدى. ءبارى ءوز قولىڭدا"، - دەپ قوستى ول.
