پرەزيدەنت قاسىم-جومارت توقايەۆتىڭ الەۋمەتتىك ماڭىزى بار ازىق-تۇلىك باعاسىن تۇراقتاندىرۋ جانە وتاندىق وندىرۋشىلەردى قولداۋ جونىندەگى تاپسىرماسىن ورىنداۋ اياسىندا الماتى قالاسىنىڭ اكىمى دارحان ساتىبالدى ازىق-تۇلىك ونەركاسىبى كاسىپورىندارىن ارالادى.
ساپار بارىسىندا قالا باسشىسى «اقساي» نان-توقاش كومبيناتى، «الماتى نان» نان كومبيناتى جانە «ماسلو-دەل» كومپانياسىندا بولدى.
«اقساي» نان-توقاش كومبيناتىندا اكىم وندىرىستىك جەلىلەر مەن جەتكىزۋ لوگيستيكاسىمەن تانىستى. كاسىپورىن جىل سايىن شامامەن 48،7 مىڭ توننا ءونىم شىعارىپ، قالا حالقىنىڭ الەۋمەتتىك نانعا دەگەن سۇرانىسىنىڭ 50%-ىنا دەيىن قامتاماسىز ەتەدى. مۇندا 1 200-دەن استام قىزمەتكەر جۇمىس ىستەيدى.
«الماتى نان» كومبيناتى تاۋلىگىنە 100 تونناعا دەيىن نان-توقاش ونىمدەرىن شىعارادى، ونىڭ 30 تونناسى الەۋمەتتىك نانعا تيەسىلى. كومپانيادا 166 ادام ەڭبەك ەتەدى، ورتاشا جالاقى – 300 مىڭ تەڭگە. ەكى كاسىپورىن بىرىگىپ، الماتىلىقتاردىڭ نان-توقاش ونىمدەرىنە، سونىڭ ىشىندە الەۋمەتتىك نانعا دەگەن نەگىزگى سۇرانىسىن قامتاماسىز ەتىپ وتىر.
ساپار «ماسلو-دەل» كومپانياسىنا بارۋمەن اياقتالدى. بۇل قازاقستانداعى ماي-توڭ ماي جانە ءسۇت ونىمدەرىن شىعاراتىن ءىرى كاسىپورىنداردىڭ ءبىرى. كاسىپورىن بەس وندىرىستىك الاڭ مەن 24 ساتۋ فيليالىن بىرىكتىرەدى، وندا 3 000-نان استام ادام جۇمىس ىستەيدى. ءوندىرىستىڭ جىلدىق كولەمى 150 مىڭ توننادان اسادى، بۇل كەيبىر ءونىم ساناتتارى بويىنشا ەلدىڭ ىشكى نارىعىنىڭ شامامەن 33%-ى.
قالا اكىمى الماتىنىڭ وتاندىق وندىرۋشىلەردى جۇيەلى تۇردە قولدايتىنىن، ءوندىرىستى جاڭعىرتۋ مەن كەڭەيتۋگە جاعداي جاسايتىنىن اتاپ ءوتتى.
«اكىمدىك تاراپىنان وندىرۋشىلەرگە قاجەتتى قولداۋ كورسەتۋگە دايىنبىز. ەڭ باستىسى، الەۋمەتتىك ماڭىزى بار ازىق-تۇلىك باعاسىنىڭ وسۋىنە جول بەرمەۋ، ولاردىڭ تۇراقتى ءوندىرىسى مەن ىشكى نارىققا ۇزدىكسىز جەتكىزىلۋىن قامتاماسىز ەتۋ»، — دەدى الماتى اكىمى دارحان ساتىبالدى.
ساپار قورىتىندىسى بويىنشا قالا باسشىسى ءتيىستى باسقارمالارعا كوتەرمە جانە بولشەك باعاعا تۇراقتى مونيتورينگ جۇرگىزۋدى، كاسىپورىندارعا ينفراقۇرىلىمدىق جانە كادرلىق ماسەلەلەردى شەشۋدە جاردەمدەسۋدى، سونداي-اق باعا قالىپتاستىرۋدىڭ اشىقتىعىن ساقتاپ، ازىق-تۇلىك جەتكىزىلىمدەرىنىڭ تۇراقتىلىعىن قامتاماسىز ەتۋدى جۇكتەدى.
الماتى اكىمدىگى الداعى ۋاقىتتا دا وتاندىق كاسىپورىندارعا جان-جاقتى قولداۋ كورسەتىپ، الەۋمەتتىك ماڭىزى بار ازىق-تۇلىك باعاسىن باقىلاۋدى جانە مەگاپوليستىڭ ازىق-تۇلىك قاۋىپسىزدىگىن باستى نازاردا ۇستايدى.