"الىس ساپار العاشقى قادامنان باستالادى" دەيدى حالىق دانالىعى. وسى ءسوزدىڭ ءمانىن رولان اناتوليي ءوز ىسىمەن دالەلدەپ كەلەدى. 18 جاستاعى جىگىت شىمكەنتتەن مەككەگە دەيىنگى 8000 شاقىرىم جولدى ۆەلوسيپەدپەن ەڭسەرۋدى ماقسات ەتكەن. Cاپار جايلى Aqshamnews.kz ءتىلشىسى تولىعىراق باياندايدى.
رولان 13 قازاندا جولعا شىققان. ءقازىر ۇزاق ساپاردىڭ 19 كۇنىن ەڭسەردى.
شىمكەنت - تۇركىستان - قىزىلوردا - اقتوبە - اتىراۋ - استراحان - ماحاچكالا - گروزنىي - تبيليسي - تەگەران - دۋباي - دوحا - ەر-رياد - مەدينا - مەككە باعىتىن بەتكە العان ول ءقازىر داعىستان ارقىلى ءوتىپ، بابايۋرت پەن ماحاچكالا قالالارىن ارتتا قالدىرعان.
ساپارعا شىققان جاس جولاۋشىنىڭ بارلىق قاجەت جابدىعى: شاتىر، قۇرال-جابدىق، ازىق-تۇلىك پەن كيىم-كەشەگى سەنىمدى سەرىگى - ۆەلوسيپەدىنە تيەلگەن. مۇنداي اۋىر جۇكپەن جولدى ەڭسەرۋ دە وڭاي ەمەس. ول كۇنىنە 80-100 شاقىرىم جولدى ارتقا تاستاپ كەلەدى. "جول ازابىن جۇرگەن بىلەر" دەمەكشى، شاتىرىن تىگە ساپ جول بويىندا تۇنەگەن كەزدەرى دە از ەمەس كورىنەدى.
ءار كۇنىن ول الەۋمەتتىك جەلىدەگى پاراقشاسىنا جۇكتەپ، وزىنە تىلەۋلەس وقىرماندارىمەن ساپار باعىتى مەن ودان العان اسەرىن ءبولىسىپ وتىرادى.
"بۇل ساپار - ءوزىمدى سىناۋ، شىدام مەن ەرىك-جىگەردىڭ مەكتەبى. الەمدى ءوز كوزىممەن كورىپ، جاڭا ادامدارمەن تانىسقىم كەلەدى"، – دەيدى ول.
كوك تۋىن جەلبىرەتكەن جولاۋشى
رولان ۆەلوسيپەدىنە قازاقتىڭ كوك بايراعىن ءىلىپ العان. جولدا كەزدەسكەن ادامدار وعان جىلى لەبىزدەرىن ءبىلدىرىپ، قولدان كەلگەن كومەگىن كورسەتىپ جاتىر. ءبىرى اسىن بەرسە، ءبىرى اقشا نەمەسە جىلى سوزبەن دەمەپ، تىلەكتەرىن جاۋدىرادى. كەيبىر ەلدى مەكەن تۇرعىندارى ونىڭ الەۋمەتتىك جەلىدەگى جازبالارىن كورىپ، ارنايى جولىن توسادى ەكەن.
ءقازىر رولان كاۆكاز ءوڭىرىن ارتقا تاستاپ، الداعى ۋاقىتتا ازەربايجان مەن تۇركيا ارقىلى جولىن جالعاستىرماق. دىتتەگەن جەرگە قولدان كەلسە، 2-3 اي كولەمىندە جەتۋگە نيەتتى.
ايتا كەتەيىك، بۇل رولاننىڭ مۇنداي ساپارعا العاش رەت شىعۋى ەمەس. بىلتىر ول جاياۋ ءجۇرىپ، بار بولعانى ءبىر ايدا 1300 شاقىرىمدى ەڭ ارتقا تاستاپ، تۇركياعا دەيىن بارىپ-قايتقان. سول ساپاردان كەيىن ساياحات ونىڭ ءومىرىنىڭ ءبىر بولىگىنە، ياعني سۇيىكتى ىسىنە اينالعان.
قازىرگىدەي ۇشاق ۇشىپ، كولىكتىڭ ءتۇر-تۇرى ايشىلىق الىس جەرگە جىلدام جەتكىزەتىن زاماندا رولان سياقتى جاستاردىڭ ءوز كۇشىمەن الىس ساپارعا شىعۋى تاباندىلىق پەن رۋحاني ىزدەنىستىڭ ۇلگىسى ىسپەتتى. ونىڭ ەرىك-جىگەرى مەن باتىلدىعى كوپشىلىككە شابىت بەرىپ وتىر. "جول مۇراتى - جەتۋ" بولسا، قاسيەتتى مەكەن - مەككەگە اتتانعان جىگىت بۇل ماقساتىنا جەتەتىنىنە كامىل سەنەدى.