الماتى قالاسى اكىمىنىڭ جاڭادان تاعايىندالعان ورىنباسارى ابزال نۇكەنوۆ ءوزىنىڭ العاشقى جۇمىس ساپارىن قالانىڭ الەۋمەتتىك نىساندارىن ارالاۋدان باستادى. ساپار اياسىندا ول قۇرىلىس بارىسىمەن جانە ستۋدەنتتىك جاتاقحانالاردىڭ جاي-كۇيىمەن تانىستى.
ابزال نۇكەنوۆ الدىمەن ازاماتتىق اۆياسيا اكادەمياسىنىڭ جاڭا ستۋدەنتتەر ۇيىنە باردى. جاقىندا پايدالانۋعا بەرىلگەن بۇل زاماناۋي عيمارات 482 ورىنعا ارنالعان. ول ازاماتتىق اۆياسيا اكادەمياسىنىڭ جانە الماتى حالىقارالىق اۋەجايىنىڭ جانىندا ورنالاسقان. جاتاقحانا جايلىلىق، قاۋىپسىزدىك جانە ەنەرگيا تيىمدىلىگى بويىنشا قازىرگى زامانعى تالاپتارعا تولىق ساي كەلەدى.
قالا باسشىسىنىڭ ورىنباسارى جاتاقحانانىڭ ىشكى بولمەلەرىن ارالاپ كوردى. ول تۇرعىن بولمەلەردى، كوۆوركينگ ايماقتارىن، دەمالىس جانە بوس ۋاقىت وتكىزۋگە ارنالعان سەكسيالاردى تەكسەردى. ستۋدەنتتەر ۇيىندە سپورت زالدارى مەن دەمالىس ايماقتارىنان بولەك، مەديسينالىق كابينەت پەن كوركەيتىلگەن اۋلا دا بار. بۇل ونى ستۋدەنتتەردىڭ باسپاناسى عانا ەمەس، جاستاردىڭ دامۋ ورتالىعىنا اينالدىرادى.
ساپار بارىسىندا ابزال نۇكەنوۆ ستۋدەنتتەرمەن تىلدەسىپ، ولاردىڭ تۇرمىس جاعدايى مەن كوڭىل-كۇيىن سۇرادى، سونداي-اق ينفراقۇرىلىمدى جاقسارتۋ جونىندەگى ۇسىنىسىن تىڭدادى.
عيماراتتىڭ ەكى قاباتىندا ءالى دە تازالاۋ جۇمىستارى جۇرگىزىلىپ جاتقاندىقتان، اكىمنىڭ ورىنباسارى جوسپارلانعان جۇمىستاردى ۋاقىتىلى اياقتاۋ جونىندە تاپسىرما بەردى.
بۇعان دەيىن حابارلانعانداي، كولىك، عىلىم جانە جوعارى ءبىلىم مينيسترلىكتەرى جانە الماتى قالاسى اكىمدىگىنىڭ قولداۋىمەن 2024 جىلى جالپى اۋماعى 7 مىڭ شارشى مەتردەن اساتىن اكىمشىلىك-قوناق ءۇي كەشەنىن «قازاەروناۆيگاسيا» رمك بالانسىنان ازاماتتىق اۆياسيا اكادەمياسىنىڭ مەنشىگىنە بەرۋ تۋرالى شەشىم قابىلدانعان. بۇل شەشىم عيماراتتى قايتا جاڭعىرتۋعا جانە زاماناۋي ستۋدەنتتەر ءۇيىن اشۋعا مۇمكىندىك بەردى. جوبا ستۋدەنتتىك جاتاقحانالار قۇرىلىسىن ۇيلەستىرەتىن جوبالىق كەڭسەنىڭ جۇمىسى اياسىندا جۇزەگە اسىرىلدى.
ابزال نۇكەنوۆتىڭ جۇمىس ساپارى قازاق ۇلتتىق اگرارلىق زەرتتەۋ ۋنيۆەرسيتەتىندە جالعاستى. اكىمنىڭ ورىنباسارى ۋنيۆەرسيتەتتىڭ جاڭا وقۋ عيماراتىن ارالاپ كوردى. بۇل عيماراتتا بىرنەشە جوعارى وقۋ ورنىنىڭ ستۋدەنتتەرى، سونىڭ ىشىندە شەتەلدىك سەرىكتەس ۋنيۆەرسيتەتتەردىڭ ءبىلىم الۋشىلارى وقيدى.
قازاق ۇلتتىق اگرارلىق زەرتتەۋ ۋنيۆەرسيتەتى باسقارما ءتوراعاسىنىڭ ءبىرىنشى ورىنباسارى – رەكتور، پروفەسسور ءپىرىمقۇل يبراگيموۆ وقۋ ورنىنىڭ دامۋ جوسپارى تۋرالى باياندادى.
– ۋنيۆەرسيتەتتى دامىتۋ باعدارلاماسى 2029 جىلعا دەيىنگى كەزەڭدى قامتيدى. باعدارلاما اياسىندا عيماراتتاردى كۇردەلى جوندەۋ جانە جاڭا نىساندار سالۋ جوسپارلانعان. جالپى بيۋدجەت شامامەن 36،2 ملرد تەڭگە، ونىڭ 27 ملرد تەڭگەسى – رەسپۋبليكالىق بيۋدجەت قاراجاتى، ال قالعان 9 ملرد تەڭگە – ۋنيۆەرسيتەتتىڭ ينۆەستيسياسى. بۇعان قوسا، ستۋدەنتتەر سانىن 10 مىڭ ادامعا دەيىن ارتتىرۋ ماقساتىندا قوسىمشا وقۋ عيماراتتارىن سالۋ جانە ينفراقۇرىلىمدى جاڭعىرتۋ كوزدەلىپ وتىر، – دەدى وقۋ ورنىنىڭ رەكتورى.
ساپار بارىسىندا قالا اكىمىنىڭ ورىنباسارى ابزال نۇكەنوۆ ۋنيۆەرسيتەتتىڭ سالىنىپ جاتقان جاتاقحاناسىندا بولىپ، قۇرىلىس جۇمىستارىنىڭ بارىسىن تەكسەردى. ول ۋنيۆەرسيتەت باسشىلىعىمەن كامپۋستى دامىتۋ، ستۋدەنتتەردىڭ تۇرمىس جاعدايىن جاقسارتۋ جانە وقۋ ۇدەرىسىنىڭ ساپاسىن ارتتىرۋ جايىن تالقىلادى.