قازاقستاندا قوعامدىق ورىنداردا حايپ ءۇشىن جاسالاتىن ارەكەتتەر جيىلەگەنىنە بايلانىستى ىشكى ىستەر مينيسترلىگى ازاماتتارعا ۇندەۋ جاسادى، - دەپ حابارلايدى Aqshamnews.kz ءتىلشىسى Polisia.kz-كە سىلتەمە جاساپ.
"لايك جيناۋ ءۇشىن جاسالعان ارەكەت باتىلدىق تا، كرەاتيۆ تە ەمەس"
مينيسترلىك وكىلى شىڭعىس الەكەشيەۆتىڭ ايتۋىنشا، جاقىندا جاستاردىڭ ساۋدا ورتالىقتارىندا نەمەسە كوشەدە جارتىلاي جالاڭاشتانىپ جۇگىرىپ، ايقايلاپ، قوعامدىق ءتارتىپتى بۇزىپ، وتباسىلار مەن بالالارعا قولايسىزدىق تۋعىزعان فاكتىلەرى تىركەلگەن. مۇنداي ارەكەتتەر زاڭمەن جازالانادى. ماسەلەن، جۋىردا استانادا وسىنداي ءتارتىپ بۇزعان ازامات 15 تاۋلىككە قامالدى.
"لايك جيناۋ ءۇشىن جاسالعان مۇنداي ارەكەت باتىلدىق تا، كرەاتيۆ تە ەمەس. بۇل – قوعامدىق ءتارتىپتى بۇزۋ، كوپشىلىككە قۇرمەتسىزدىك كورسەتۋ، ار-ۇياتقا جات قىلىق. قوعامدىق ورىندا جاسالعان كەز كەلگەن زاڭعا قايشى نەمەسە ۇيات ارەكەتكە جول بەرىلمەيدى. زاڭعا سايكەس جاۋاپقا تارتىلادى"، - دەدى الەكەشيەۆ.
"ءوزىڭىزدى دە، اينالاداعى ادامداردى دا قۇرمەتتەڭىزدەر"
ءىىم وكىلى قازاقستاندىقتاردى، اسىرەسە جاستاردى، كۇماندى ينتەرنەت-ترەندتەرگە ەرمەۋگە شاقىرىپ، ادامدىق قادىر-قاسيەتتى ساقتاۋ قاجەتتىگىن اتاپ ءوتتى. مينيسترلىك مۇنداي وقيعالاردى دەرەۋ توقتاتاتىنىن جانە قوعامدىق ءتارتىپ پەن قاۋىپسىزدىكتى قاداعالاۋدى جالعاستىراتىنىن مالىمدەدى.
"بارشاعا، اسىرەسە جاستارعا ايتارىمىز: كۇماندى ينتەرنەت-ترەندتەرگە ەرمەڭىزدەر. ءوزىڭىزدى دە، اينالاداعى ادامداردى دا قۇرمەتتەڭىزدەر. ناعىز قۇرمەت پەن ابىروي جاقسى ءىس، پايدالى وي، دۇرىس ارەكەت ارقىلى كەلەدى"، - دەدى رەسمي وكىل.
وقيعا انىقتاماسى
ەسكە سالايىق، 21 قازاندا استانادا ەر ادام ساۋدا ورتالىعىندا ىشكيىممەن جۇگىرىپ، تۇرعىنداردان وزىنە پاتەر سىيلاۋدى سۇراعان. ۆيدەوعا قاراعاندا، ول بەلارۋس بلوگەرى Mellstroy-دىڭ پاتەر ۇتىسىنا قاتىسپاق بولعان.