الماتى حايۋاناتتار باعىندا جۋرناليستەر مەن بلوگەرلەردىڭ ءباسپاسوز-تۋرى ءوتتى. وڭىرلىك كوممۋنيكاسيالار قىزمەتى ۇيىمداستىرعان ءىس-شارادا حايۋاناتتار باعىنىڭ جاڭارتىلعان كەلبەتىن كورۋگە مۇمكىندىك الدىق.
بيىل زووباق ۇجىمى جانۋارلاردى كوبەيتۋ ىسىندە ايتارلىقتاي جەتىستىككە جەتكەن. ۆەتەرينار دارىگەر يۋليا دۋدكينانىڭ ايتۋىنشا، 31 ءتۇرلى جانۋاردان 87 ءتول الىنعان. ولاردىڭ اراسىندا امۋر جولبارىسى، اق قاسقىر، كەنگۋرۋ، لەمۋر، بۇعى مەن تاۋتەكەلەر بار.
«ەڭ ۇلكەن قۋانىشىمىز – امۋر جولبارىسىنىڭ جۇبىنان ەكى كۇشىكتىڭ دۇنيەگە كەلۋى. بۇل ناتيجەگە جەتۋ ءۇشىن ءتورت جىل بويى جۇيەلى تۇردە جۇمىس ىستەدىك. سونىمەن قاتار، بيىل ەكى جۇپ اق قاسقىر تولدەدى – بىرىنەن ءۇش، ەكىنشىسىنەن ءبىر بولتىرىك تۋدى. بۇل ەلىمىزدە سيرەك كەزدەسەتىن ءارى باعالى تۇرلەرى»، – دەيدى يۋ.دۋدكينا.
ب ا ق اكىمشىلىگى الداعى ۋاقىتتا كوللەكسيانى جاڭا ەكزوتيكالىق جانۋارلارمەن تولىقتىرۋدى جوسپارلاعان. جاقىن ارادا اقش-تان تاماندۋا مەن التىجولاقتى كىرەۋكەي، كانادادان سىلەۋسىندەر جەتكىزىلمەك. ال الماتى حايۋاناتتار باعى ءوز كەزەگىندە شەتەلدىك ارىپتەستەرىنە ءساتتى كوبەيىپ جاتقان اققۇيرىق بۇركىتتەردى تابىستايدى.
كوللەكسيا جەتەكشىسى ايمان ەدگەبايەۆانىڭ ايتۋىنشا، حايۋاناتتار باعىنىڭ باستى ماقساتى – جانۋارلاردى كورسەتۋ عانا ەمەس، تابيعاتتى قورعاۋ جانە جاستار اراسىندا ەكولوگيالىق مادەنيەتتى قالىپتاستىرۋ.
«الماتى حايۋاناتتار باعى جىرتقىش قۇستاردى – ساقالتاي، اق يىقتى جانە اق باستى بۇركىتتى، قۇزعىن مەن گريفتەردى كوبەيتۋ ىسىندە حالىقارالىق دەڭگەيدە تانىمال. امەريكالىق Timbavati Wildlife Park ۇيىمى ءبىزدىڭ باقتا كۋمايدىڭ تابيعي جولمەن كوبەيىپ جاتقانىن ەرەكشە اتاپ ءوتتى. بۇل – بۇكىل الەمدەگى سيرەك جاعداي جانە الماتى ءۇشىن ۇلكەن مارتەبە»، – دەدى ا.ەدگەبايەۆا.
بۇگىندە الماتى حايۋاناتتار باعى – ەلدەگى تابيعاتتى قورعاۋ مەن بيوالۋانتۇرلىلىكتى ساقتاۋ ىسىندەگى جەتەكشى ورتالىقتاردىڭ ءبىرى. ىرگەسى سوناۋ 1937 جىلى قالانعان پارك ءقازىر ورتالىق ازياداعى ەڭ تانىمال رەكرەاسيالىق جانە ەكولوگيالىق ورتالىقتاردىڭ ءبىرى. ول – الماتىلىقتار مەن قالا قوناقتارى ءۇشىن ەڭ ءجيى باراتىن دەمالىس ورىندارىنىڭ بىرەگەيى. بالالار مەن وتباسىلىق دەمالىسقا ارنالعان نەگىزگى باعىتتاردىڭ ءبىرى رەتىندە ىشكى تۋريزمگە قوسقان سالىمى دا جوعارى. بيىلدىڭ وزىندە باققا 1 ميلليوننان استام ادام كەلگەن.