كۇزدىڭ سوڭعى ايى ەلىمىز ءۇشىن ءبىرقاتار ماڭىزدى جاڭالىقتار مەن وزگەرىستەر اكەلمەك. ەكونوميكادان باستاپ سيفرلاندىرۋعا، اۋە تاسىمالى مەن جاستار باستامالارىنا دەيىن تىڭ جايتتارعا تولادى. اqshamnews.kz ءتىلشىسى ماتەريالدا تارقاتادى.
ۇلتتىق بانك بازالىق مولشەرلەمەنى قايتا كوتەرۋى مۇمكىن
قازاننىڭ باسىندا ۇلتتىق بانك ءتوراعاسى تيمۋر سۇلەيمەنوۆ ينفلياسيا ماقساتتى دالىزگە تۇسپەسە، بازالىق مولشەرلەمە تاعى ءوسۋى مۇمكىن ەكەنىن مالىمدەگەن بولاتىن.
"قاراشادا بولجامدى راۋند وتكىزىپ، ماكروپارامەترلەردى جاڭارتامىز. ىشكى جانە سىرتقى فاكتورلاردىڭ ينفلياسياعا اسەرى قايتا باعالانادى"، - دەدى سۇلەيمەنوۆ.
بازالىق مولشەرلەمەگە قاتىستى شەشىم 28 قاراشادا جاريالانادى. ەگەر راسىمەن وسسە، نەسيە قۇنى ارتىپ، دەپوزيتتەر بويىنشا تابىس جوعارىلاۋى مۇمكىن.
سۋرەت: ۇلتتىق بانك
سيفرلاندىرۋ جانە ميگراسيا: جاڭا پلاتفورما ىسكە قوسىلادى
1 قاراشادان باستاپ ەلىمىزدە ميگراسيالىق پروسەستەردى ەسەپكە الۋدىڭ ءبىرىڭعاي سيفرلىق پلاتفورماسى كەزەڭ-كەزەڭىمەن ىسكە قوسىلا باستايدى.
جۇيە:
-
ميگرانتتار تۋرالى اقپاراتتى كەلۋىنە دەيىن جينايدى،
-
تەكسەرىستەردى اۆتوماتتى رەجيمدە جۇرگىزەدى،
-
قىزمەتتەردى ءبىر تەرەزە ارقىلى كورسەتەدى،
-
كوشى-قون ستاتيستيكاسىن تالداپ، بولاشاق اعىنداردى بولجاۋعا مۇمكىندىك بەرەدى.
جاسۇلان مادييەۆتىڭ ايتۋىنشا، جاڭا مودەل ميگراسيالىق راسىمدەردى 60-70% قىسقارتادى، اشىقتىقتى ارتتىرادى جانە مەملەكەتتىك ورگانداردىڭ جۇمىسىن جەڭىلدەتەدى.
سۋرەت: Gov.kz
قاراشادان باستاپ ءبىرقاتار جاڭا اۋە باعىتى اشىلادى
Qazaq Air (Vietjet Qazaqstan)
-
استانا-سامارقاند - 7 قاراشادان، جۇما جانە جەكسەنبى
-
استانا-بىشكەك - 10 قاراشادان، دۇيسەنبى جانە بەيسەنبى
FlyArystan
-
اقتاۋ-دۋباي - 29 قاراشادان، سەنبى كۇندەرى (مەرەكە كەزدەرىندە قوسىمشا رەيستەر)
بيلەتتەر باعاسى 62 مىڭ تەڭگەدەن باستالادى.
سۋرەت: FlyArystan
قىسقى شينالار قىمباتتاي باستايدى
اۆتوشينا ساتاتىن سالوندار 1 قاراشادان باستاپ قىسقى رەزەڭكەنىڭ باعاسى وسەتىنىن ايتتى. بۇل - ماۋسىمدىق باعا ءوسىمى. ەسكە سالايىق، 30 قاراشاعا دەيىن جۇرگىزۋشىلەر كولىكتى قىسقى دوڭگەلەككە اۋىستىرۋعا مىندەتتى.
قازىرگى ورتاشا باعالار (تانىمال ءارى تەكسەرىلگەن برەندتەر بويىنشا):
-
205/55 R16 - دوڭگەلەككە 25 مىڭ تگ-دەن باستاپ
-
185/65 R15 - 18 مىڭ تگ-دەن باستاپ
-
215/65 R16 - 27 مىڭ تگ-دەن باستاپ
باعالار ازىرگە ماۋسىم رەسمي باستالماي تۇرعاندا وزەكتى. تانىمال ەمەس ماركالار ەسەپكە الىنعان جوق.
سۋرەت: اشىق دەرەككوز
وقۋشىلار دەمالىستان ورالادى
27 قازان - 2 قاراشا ارالىعىندا بەرىلگەن كۇزگى كانيكۋل اياقتالىپ، 3 قاراشادا وقۋشىلار II توقسانداعى وقۋىن باستايدى.
ال كەلەسى دەمالىس - 29 جەلتوقسان - 7 قاڭتار ارالىعىندا وتەتىن قىسقى كانيكۋل بولادى.
"قايرات" يتاليالىق كلۋبپەن كەزدەسەدى
الماتىلىق "قايرات" كلۋبى چل-داعى كەزەكتى سىرت الاڭداعى ءماچىن وتكىزەدى.
-
6 قاراشا - "ينتەر" vs "قايرات"، ميلان، "سان-سيرو"
-
26 قاراشا - "كوپەنگاگەن" vs "قايرات"، دانيا
سونداي-اق، 22 قاراشادا دوحادا قازاقستاندىق سپورتشى اسۋ المابايەۆ UFC-دە امەريكالىق الەكس پەرەزبەن جەكپە-جەك وتكىزەدى. بۇل - تاريحتاعى العاشقى كاتارداعى UFC ءتۋرنيرى.
قاراشادا قانشا كۇن دەمالامىز؟
قاراشادا قازاقستاندا دەمالىس بەرىلەتىن مەرەكە جوق.
قاراشادا قانداي مەرەكە بار؟
قاراشادا كاسىبي جانە باسقا دا مەرەكەلەر بار:
- 5 قاراشا - سىرتقى بارلاۋ كۇنى.
- 8 قاراشا - ستاتيستيكا كۇنى.
- 10 قاراشا - سيفرلاندىرۋ جانە اقپاراتتىق تەحنولوگيالار قىزمەتكەرلەرىنىڭ كۇنى.
- 15 قاراشا - ۇلتتىق ۆاليۋتا - تەڭگە كۇنى، قازاقستان رەسپۋبليكاسى قارجى جۇيەسى قىزمەتكەرلەرىنىڭ كاسىبي مەرەكەسى.
- 16 قاراشا (قاراشانىڭ ءۇشىنشى سەنبىسى) - بۇرعىشىلار كۇنى.
- 17 قاراشا (قاراشانىڭ ءۇشىنشى جەكسەنبىسى) - اۋىل شارۋاشىلىعى، تاماق جانە وڭدەۋ ونەركاسىبى قىزمەتكەرلەرىنىڭ كۇنى.