ماڭعىستاۋ وبلىسىندا جاڭاوزەندەگى مەكتەپ وقۋشىلارى اراسىنداعى جانجالعا قاتىستى سوت شەشىمى شىقتى، - دەپ حابارلايدى Aqshamnews.kz ءتىلشىسى.
وقيعا الەۋمەتتىك جەلىدە تاراعان بەينەجازبادان كەيىن ۇلكەن قوعامدىق رەزونانس تۋدىردى. ۆيدەودا ەكى ءجاسوسپىرىم قىزدىڭ ءبىر-بىرىن اياۋسىز سوققىعا جىعىپ، توبەلەستى قاتارلاستارى مەن كىشكەنتاي بالانىڭ كوز الدىندا جالعاستىرعانى كورىنەدى.
وقيعا قالاي بولدى؟
سوتتىڭ مالىمەتىنشە، 2025 جىلدىڭ 8 قازانىندا ساعات 21:00 شاماسىندا جاڭاوزەن قالاسىنىڭ كوشەلەرىنىڭ بىرىندە ەكى ءجاسوسپىرىم قىز اراسىندا جانجال تۋىنداپ، توبەلەسكە ۇلاسقان. قىزداردىڭ ءبىرى ءتۇرلى جاراقات العان. وقيعا كۋاگەرلەرى تۇسىرگەن ۆيدەو Instagram جەلىسىندە جىلدام تاراپ، قوعام مەن قۇقىق قورعاۋ ورگاندارىنىڭ نازارىن اۋداردى.
اناسىنا ايىپپۇل سالىندى
سوت وتىرىسى بارىسىندا قىزداردىڭ ءبىرى تاربيەسىنە جاۋاپتى اناسىنىڭ بالا تاربيەلەۋ مىندەتتەرىن ءتيىستى دەڭگەيدە ورىنداماعانى انىقتالدى. بۇل ق ر اقبتك-نىڭ 127-بابى 3-بولىگى بويىنشا اكىمشىلىك قۇقىقبۇزۋشىلىق بولىپ تانىلدى.
جاۋاپكەر ايەل ءوز كىناسىن مويىنداعانىمەن، جانجالدى قارسى تاراپتىڭ ءبىرىنشى بولىپ باستاعانىن ايتتى. سوعان قاراماستان، سوت ونى كىنالى دەپ تانىپ، 78 640 تەڭگە (20 اەك) كولەمىندە ايىپپۇل سالدى.
شەشىم زاڭدى كۇشىنە ەنگەن جوق
سوت ۇكىمى ءالى زاڭدى كۇشىنە ەنبەگەن. اتالعان باپ بويىنشا ايىپپۇلدان بولەك، 10 تاۋلىككە دەيىن اكىمشىلىك قاماۋعا الۋ شاراسى دا قاراستىرىلعان.
سوت وكىلدەرى اتا-انالار بالالاردىڭ تاربيەسى مەن مىنەز-قۇلقىنا جاۋاپتى ەكەنىن ەسكە سالدى. مۇنداي جاعدايلاردىڭ جاسوسپىرىمدەردىڭ پسيحولوگيالىق جاعدايىنا جانە قوعامدىق تارتىپكە تەرىس اسەر ەتەتىنى اتاپ ءوتىلدى.