بەس قازاقستاندىق ۋنيۆەرسيتەت الەمنىڭ ەڭ ۇزدىك وقۋ ورىندارى قاتارىنا ەندى، دەپ حابارلايدى اqshamnews.kz.
بۇل تۋرالى پرەزيدەنت قاسىم-جومارت توقايەۆ «قازاقستان – اكادەميالىق ءبىلىم اۋماعى» حالىقارالىق ستراتەگيالىق سەرىكتەستەر فورۋمىندا مالىمدەدى. مەملەكەت باسشىسى ەلىمىزدەگى جوعارى وقۋ ورىندارىنىڭ بەدەلدى حالىقارالىق رەيتينگتەردەگى كورسەتكىشتەرى تۇراقتى تۇردە جاقسارىپ كەلە جاتقانىن اتاپ ءوتتى.
پرەزيدەنتتىڭ سوزىنشە، قازاقستاندىق جوو-لاردىڭ جەتىستىگى الەمدىك ءبىلىم بەرۋ كەڭىستىگىندەگى ەلىمىزدىڭ ورنىن ايقىنداي تۇسەدى.
"QS حالىقارالىق رەيتينگ اگەنتتىگىنىڭ پرەزيدەنتى نۋنسيو كۆاكۆارەللي مىرزا ءوز بايانداماسىندا بۇل ماسەلەگە كەڭىنەن توقتالدى، قازاقستان ۋنيۆەرسيتەتتەرىنىڭ قارقىندى دامىپ كەلە جاتقانىن ەرەكشە اتاپ ءوتتى. ءبىز ورتاق ماقسات جولىندا كۇش بىرىكتىرىپ، ارىپتەستىگىمىزدى نىعايتا تۇسۋگە مۇددەلىمىز، بىرلەسىپ جۇمىس ىستەۋگە قاشاندا دايىنبىز. سونداي-اق ەلىمىزدىڭ 5 ۋنيۆەرسيتەتى Times Higher Education باسىلىمى ۇسىنعان الەمدەگى ۇزدىك وقۋ ورىندارىنىڭ تىزىمىنە قوسىلدى. بۇل دا ءبىز ءۇشىن زور جەتىستىك"، – دەدى پرەزيدەنت.
فورۋمدا جوعارى ءبىلىم ساپاسىن ارتتىرۋ، حالىقارالىق سەرىكتەستىكتى كۇشەيتۋ جانە ۇزدىك ءبىلىم بەرۋ تاجىريبەلەرىن ەنگىزۋ ماسەلەلەرى تالقىلاندى.