الماتى وبلىسى، ەڭبەكشىقازاق اۋدانىندا دارىگەرگە قول كوتەرگەن ەر ادام 3 تاۋلىككە قامالدى، دەپ حابارلايدى Aqshamnews.kz ءتىلشىسى.
وقيعا ەڭبەكشىقازاق اۋداندىق اۋرۋحاناسىنىڭ قابىلداۋ بولىمىندە بولعان. 8 قىركۇيەكتە ساعات 17:00 شاماسىندا بالاسىن جاراقاتىمەن الىپ كەلگەن ەر ادام دارىگەردىڭ ۇسىنىسىنا كەلىسپەي، ونىڭ قىزمەتىنە كەدەرگى كەلتىرگەن.
تراۆماتولوگ بالانىڭ سۇيەگى سىنۋى مۇمكىن ەكەنىن ايتىپ، گيپس سالۋ كەرەك دەگەن. الايدا اكەسى دارىگەردىڭ پىكىرىنە قارسى شىعىپ، داۋ كەزىندە مەديسينا قىزمەتكەرىنە ايقايلاپ، جاعاسىنان الادى.
سوتتا ازامات كىناسىن مويىنداپ، ەموسياعا بەرىلگەنىن تۇسىندىرگەن. دارىگەر بولعان جايتتى راستادى.
سوت ماتەريالدارىن زەرتتەگەننەن كەيىن، ەر ادام ق ر اقبتك-نىڭ 80-1-بابىنىڭ 2-بولىگى («مەديسينالىق قىزمەتكەردىڭ زاڭدى قىزمەتىنە كەدەرگى كەلتىرۋ») بويىنشا كىنالى دەپ تانىلىپ، 3 تاۋلىككە اكىمشىلىك قاماۋعا الىندى.
سوت مەديسينا قىزمەتكەرلەرىنە قۇرمەتسىزدىك كورسەتۋ، ولاردى قورقىتۋ نەمەسە كۇش قولدانۋ زاڭمەن جازالاناتىنىن اتاپ ءوتتى.