"ەشكىمگە كەرەك ەمەسپىن..." الماتى وبلىسىندا وزىنە قول جۇمساعان وقۋشىنىڭ حاتى جۇرتتىڭ جاعاسىن ۇستاتتى

الماتى وبلىسى، سايماساي اۋىلىندا 27 قازاندا بولعان قايعىلى وقيعا ەلدى ءدۇر سىلكىندىردى. الدىن الا مالىمەتكە سەنسەك، 6-سىنىپ وقۋشىسى ءوز ءۇيىنىڭ اۋلاسىندا وزىنە قول جۇمساعان. جەرگىلىكتى ءبىلىم باسقارماسى قازا تاپقان بالانىڭ وتباسى ەسەپتە تۇرعانىن العا تارتسا، اۋىل تۇرعىندارى تۇرمىستىق زورلىق-زومبىلىق دەرەكتەرى انىقتالماعانىن حابارلاپ، قايعىلى وقيعاعا باسقا جاعداي سەبەپ بولعانىن ايتىپ وتىر، - دەپ حابارلايدى Aqshamnews.kz ءتىلشىسى. 

ءبىلىم باسقارماسىنىڭ مالىمدەمەسى

الماتى وبلىستىق ءبىلىم باسقارماسىنىڭ دەرەگىنشە، بالا ءۇيدىڭ ورتانشىسى. ول اناسىمەن، وگەي اكەسى جانە باۋىرلارىمەن بىرگە تۇرعان.

2024 جىلدان بەرى وتباسى تۇرمىستىق جاعدايىنىڭ سانيتارلىق تالاپتارعا ساي بولماۋىنا بايلانىستى پروفيلاكتيكالىق ەسەپتە تۇرعان. ۇيىمداستىرىلعان تەكسەرىس ناتيجەسىندە ءۇي جاعدايى جاقسارعانى ايتىلعان. ونىڭ ۇستىنە، مەكتەپ پەن اۋداندىق قىزمەتتەر تاراپىنان وتباسىعا قولداۋ كورسەتىلىپ وتىرعانى ايتىلدى.

"بالانىڭ مىنەز-قۇلقى مەن وقۋ ۇلگەرىمى قاناعاتتانارلىق بولدى. قاجەتتى الەۋمەتتىك كومەك كورسەتىلىپ وتىردى" ، - دەپ حابارلادى باسقارما.

ءقازىر پسيحولوگتار وتباسىعا كومەك كورسەتىپ جاتىر، ال قۇقىق قورعاۋ ورگاندارى تەرگەۋ جۇرگىزىپ جاتىر.

اۋىل تۇرعىندارى نە دەيدى؟

ال اۋىل تۇرعىندارى جاعداي مۇلدە باسقاشا بولعانىن ايتادى. ولاردىڭ سوزىنشە، وتباسى كوپتەن بەرى قيىن جاعدايدا ءومىر سۇرگەن:

• اناسى مەن وگەي اكەسى ىشىمدىك ىشكەن،

• ۇيدە ءجيى جانجال بولعان،

• بالالار اش، كىر-قوجالاق جۇرگەن،

• وگەي اكەسى بالالاردى ۇنەمى ۇرىپ-سوققان.

كورشىلەرى بالالاردى بىرنەشە رەت تاماقتاندىرعاندارىن، كيىم بەرگەندەرىن ايتادى. تۇرعىنداردىڭ ايتۋىنشا، قازا تاپقان بالانى ەڭ كىشى ءىنىسى اۋلادا تاۋىپ العان، ال اتا-اناسى سول ساتتە ۇيدە بولماعان.

"وگەي اكەسى بالالاردى قاتتى ۇراتىن. ءبىر رەت كورشىلەردىڭ شكافىنا تىعىلىپ، جىلاپ وتىرعانىن كوردىك،" – دەيدى اۋىل تۇرعىنى.

سونداي-اق جەرگىلىكتى جۇرت بالانىڭ مەكتەپتەن دە قىسىم كورگەنىن العا تارتادى.

"مەن ەشكىمگە كەرەك ەمەسپىن...": وقۋشىنىڭ سوڭعى حاتىندا نە جازىلعان؟

وقيعادان كەيىن جەلىدە بالاعا تيەسىلى دەلىنگەن كۇندەلىكتىڭ سۋرەتتەرى تارادى. وندا ءجاسوسپىرىمنىڭ اۋىر پسيحولوگيالىق كۇيدە بولعانى بايقالادى:

"مەن ەشكىمگە كەرەك ەمەسپىن... نەگە ماعان ۇنەمى ۇرسىپ، ۇرا بەرەدى؟ مەن بوتەنمىن، كەرەكسىزبىن. مەن ءوزىمدى تومەن سەزىنەتىن مەكتەپكە كەلدىم. اينالامنىڭ ءبارى قۋانىپ، باقىتتى جۇرەدى. مەن نەگە باقىتتى بولا المايمىن؟"، - دەپ جازىلعان 6-سىنىپ وقۋشىسىنىڭ ولەر الدىنداعى حاتىندا. 

سونىمەن بىرگە "نەمولچي.kz" قورى دا بالانىڭ مەكتەپتە جانە ۇيدە ءجابىر كورگەنى تۋرالى شاعىمدانعانىن حابارلادى.

پوليسيا جاۋابى

الماتى وبلىستىق پوليسيا دەپارتامەنتى قىلمىستىق ءىس قوزعالعانىن راستادى. تەرگەۋ ەرەكشە باقىلاۋعا الىنعان.

"بارلىق ءمان-جاي تولىق زەرتتەلەدى. قىلمىستىق ءىس اياسىندا وبەكتيۆتى شەشىم قابىلدانادى،" – دەدى ۆەدومستۆو.