اباي وبلىسىنداعى ايەلدەر كولونياسىنان الاياقتىعى ءۇشىن جازاسىن وتەگەن 26 جاستاعى ايەل بوستاندىققا شىقتى. ونى مەكەمە قاقپاسىنان جەتىسۋ وبلىسىنان ارنايى كەلگەن كۇيەۋى قارسى الىپ، قوس جۇبايدىڭ ساعىنىستى ءساتى جۇرەكتەردى تەبىرەنتتى، - دەپ حابارلايدى Aqshamnews.kz ءتىلشىسى.
سوت شەشىمىمەن بەس جىلعا باس بوستاندىعىنان ايىرۋ جازاسى تاعايىندالعان ايەل جازاسىن وتەۋ بارىسىندا اسحانا بولىمىندە كومەكشى اسپاز بولىپ ەڭبەك ەتىپ، ءتارتىپ پەن جاۋاپكەرشىلىك تانىتقان.
جىلدار بويى ساعىنىسقان ەرلى-زايىپتىلار قۋانىشتان كوز جاسىن تىيا الماي، ۇزاق قۇشاقتاسىپ تۇرىپ قالدى. بۇل – تەك بوستاندىققا شىعۋ ەمەس، انانىڭ وتباسى مەن بالالارىنا قايتا ورالۋى، جاڭا ءومىردىڭ باستالۋى ەدى.
بوستاندىققا شىققان ازاماتشا مەكەمە ۇجىمىنا العىسىن ءبىلدىرىپ، جاڭا بەتبۇرىس جاساۋعا دايىن ەكەنىن ايتتى.
"مەن ءۇشىن ەڭ ۇلكەن باقىت - جاقىندارىمنىڭ جانىمدا بولۋى. وسى كۇندى تالاي كۇتتىم. بۇرىن ۆيزاجيست بولىپ جۇمىس ىستەدىم، ەندى سۇيىكتى ىسىمە قايتا ورالعىم كەلەدى. تۇرمە قابىرعاسىندا وتكەن جىلدار اۋىر، ءبىراق ۇلكەن ساباق بولدى. ەندىگى ماقساتىم - بالالارىم مەن وتباسىم ءۇشىن جارىق ءومىر قۇرۋ"، — دەدى ول.
كولونيا اكىمشىلىگى دە سوتتالعان ايەلدەردىڭ قوعامعا بەيىمدەلۋى ءاردايىم نازاردا ەكەنىن اتاپ ءوتتى.
"ءبىز جازاسىن وتەۋشىلەردى تەك كولونيادا عانا ەمەس، بوستاندىققا شىعار الدىندا دا قولدايمىز. ەڭبەك ەتۋگە، جاڭا داعدىلار الۋعا جاعداي جاسايمىز. باستى ماقسات - ولاردىڭ جاڭا ومىرگە سەنىممەن قادام باسۋى جانە وتكەن قاتەلىكتەردى قايتالاماۋى"، - دەدى №23 مەكەمە باستىعىنىڭ ورىنباسارى انار سابييەۆا.
جاس انا ەندى جاڭا ءومىر پاراعىن وتباسىمەن بىرگە اشۋعا نيەتتى.