فۋتبولدان قازاقستان پرەمەر-ليگاسىنىڭ وسى ماۋسىمداعى جەڭىمپازى الماتىدا انىقتالدى.
ورتالىق ستاديونىندا ەل بىرىنشىلىگىنىڭ شەشۋشى 26-تۋرى اياسىندا الماتىلىق «قايرات» ەلوردالىق «استانا» كومانداسىن قابىلدادى. الاڭ قوجايىندارى تۋرنيرلىك كەستەدە 58 ۇپايمەن ءبىرىنشى ورىندا تۇردى. ولارعا چەمپيون اتانۋ ءۇشىن جەڭىستەن بولەك، تەڭ ناتيجە دە جەتكىلىكتى بولدى. ال 56 ۇپايمەن ەكىنشى ورىندا تۇرعان ەلوردالىق ۇجىمعا مىندەتتى تۇردە جەڭىسكە جەتۋ قاجەت ەدى. تاۋەلسىز قازاقستان تاريحىندا العاش رەت قپل جەڭىمپازى سوڭعى تۋرداعى ءوزارا كەزدەسۋدە شەشىلدى.
الماتى مەن استانا كوماندالارىنىڭ چەمپيوندىق باسەكەسىندە ورتالىق ستاديوندا لىق تولدى. «قايرات» پەن «استانا» ماچىنا بيلەتتەر ساتىلىمعا شىققان سوڭ، ساناۋلى ساعاتتاردا ساتىلىپ، SOLD OUT جاريالاندى. ويىن كۇنى جانكۇيەرلەر الماتىنىڭ باستى سپورتتىق الاڭىنا قالانىڭ تۇكپىر-تۇكپىرىنەن جينالدى. قازاقستان پرەمەر-ليگاسىنىڭ باستى ويىنى – تەك ەلىمىزدىڭ ەمەس، شەتەلدىك جانكۇيەرلەردىڭ دە نازارىن وزىنە اۋداردى. سولاردىڭ ءبىرى – مانچەستەر قالاسىنان كەلگەن تانىمال بلوگەر جانە StuntPegg اتتى YouTube-ارناسىنىڭ اۆتورى نيۆ پەترۋسسيەللو.
– قازاقستان تۋرالى جاقىندا عانا ەستىدىم، ءبىراق ءبارىن ءوز كوزىممەن كورۋ قىزىق بولدى. «قايرات» جايلى كوپ وقىدىم. ءوزىم فۋتبولمەن تىنىستايتىن قالا – مانچەستەردەنمىن. بىلەمىن، بىرنەشە جىل بۇرىن «مانچەستەر يۋنايتەد» «استانامەن» ويناعان. ەندى «قايرات» پەن «استانانىڭ» ويىنىن كورۋگە كەلدىم، ەكەۋى دە وتە مىقتى كوماندالار، سوندىقتان ويىن اسەرلى بولاتىنى انىق، – دەدى نيۆ ويىن الدىندا.
ال ورتالىق ستاديونعا العاشقىلاردىڭ ءبىرى بولىپ كەلگەن 16 جاستاعى تيمۋر مەيرامعالييەۆ ويىندى كورۋگە اتا-اناسى جانە ىنىلەرىمەن بىرگە ارنايى ات باسىن بۇرعانىن ايتتى.
– بۇگىنگى ويىندى وتكىزىپ الۋ مۇمكىن ەمەس. ەلدىڭ ەڭ مىقتى ەكى كلۋبى كەزدەسەدى، بۇل ءبىزدىڭ ماقتانىشىمىز. اسىرەسە، ءوزىم قاتارلى ساتپايەۆتىڭ ويىنىن اسىعا كۇتىپ ءجۇرمىن. بۇكىل وتباسىمىزبەن «قايراتتى» قولدايمىز. مەن 8 جاسىمنان فۋتبولمەن اينالىسامىن، ەندى ىنىلەرىم دە باستادى. اكەم بۇرىن ويناعان، فۋتبول ءبىزدىڭ وتباسىلىق ءداستۇرىمىز. فۋتبولعا ءبىر رەت عاشىق بولساڭ، ول ءومىرىنىڭ بولشەگىنە اينالادى، – دەدى جانكۇيەر.
ءبىرىنشى تايم
ەل كلاسسيكوسىندا يتاليادان كەلگەن ماماندار تورەشىلىك ەتتى. ويىننىڭ باس تورەشەسى – ماتتەو ماركەتتي بولدى. قاپتالداعى كومەكشىلەرى – ۆالەريو كولاروسسي مەن كريستيان روسسي بولسا، VAR جۇيەسىن داۆيدە گەرزيني باقىلادى. ماچتىڭ العاشقى مينۋتتارىنان باستاپ الماتىلىق كوماندا دوپقا يەلىك ەتىپ، قارسىلاس قاقپاسىنا ءقاۋىپ ءتوندىردى. الايدا، «استانا» ويىنشىلارى قورعانىستا ۇيىمشىلدىق تانىتىپ، يوسيپ چوندريچ تۇرعان قاقپاعا اسا ءقاۋىپتى سوققى جاساتپادى. كەرىسىنشە، الاڭ قوناقتارى ويىننىڭ 15-مينۋتىندا قارىمتا شابۋىلعا شىعىپ، «قايرات» قورعانىسىنىڭ وسال تۇسىن تاپتى. ەلوردالىق شابۋىلشى مارين توماسوۆ ءدال سوققىمەن ەسەپتى اشتى. ول بيىل ەل چەمپيوناتىنىڭ ءبىرىنشى تۋرىندا دا الماتىلىقتارعا گول سوققان ەدى. 22 جاستاعى «قايرات» قاقپاشىسى تەمىرلان اناربەكوۆ الىس بۇرىشقا ۇشقان دوپقا بارىنشا سەكىرگەنىمەن، وعان جەتە المادى. ءوز الاڭىندا باستى قارسىلاسىنا ەسە جىبەرىپ جاتقان رافاەل ۋرازباحتين شاكىرتتەرى ءبىرىنشى تايمنىڭ اياعىنا دەيىن «استانا» قاقپاسىنان ساڭىلاۋ ىزدەدى. 40-مينۋتتا وفري ارادتى «قايرات» اكادەمياسىنىڭ تۇلەگى دامير قاسابۋلات الماستىردى. الايدا، ەلوردالىق كوماندانىڭ قورعانىسى سىر بەرمەدى. قايتا 43-مينۋتتا بۇرىشتاما دوبىنان كەيىن قاقپاعا ءدال باعىتتالعان دوپتى اناربەكوۆ قايتارىپ، قارسىلاستىڭ ەسەپتى ەسەلەۋىنە مۇمكىندىك بەرگەن جوق.
ءۇزىلىس جانە ماراپات
الماتىدا ءوتىپ جاتقان تارتىستى ويىندى جانكۇيەرلەرمەن بىرگە العاشقى مينۋتتاردان باستاپ قازاقستاندىق فۋتبولدىڭ ارداگەرلەرى مەن قالا اكىمى دارحان ساتىبالدى تاماشالادى. ال ويىن ءۇزىلىسى كەزىندە شاھار باسشىسى 2025 جىلعى ماۋسىم قورىتىندىسى بويىنشا «قايرات» اكادەمياسىنىڭ تاربيەلەنۋشىلەرىن ماراپاتتادى. كلۋب تاريحىندا العاش رەت اكادەميانىڭ بارلىق جاس كومانداسى ءوز ليگالارىندا چەمپيون اتاندى.
ەكىنشى تايم
ويىننىڭ ەكىنشى جارتىسىندا الاڭعا «قايرات» تاراپىنان شابۋىلشى ەدميلسون قوسىلدى. ول 20-شى نومەرلى ەركىن تاپالوۆتى الماستىردى. بويشاڭ برازيليالىق فۋتبولشى الاڭعا شىققان كەيىن ويىن ورنەگى وزگەردى. ول اۋەلەتە ۇشقان دوپتى ارىپتەستەرىنە جەتكىزىپ، وتكىر شابۋىلدارعا جول اشتى. ماچتىڭ 55-مينۋتىندا ەدميلسون جوعارىدان بەرىلگەن پاستى ۆالەريي گرومىكوعا ءتۇسىرىپ بەردى. وسى كەزدە ايىپ الاڭىندا «استانا» قورعاۋشىلارى مەن «قايرات» شابۋىلشىلارى اراسىندا تارتىس باستالىپ، دوپ داستان ساتپايەۆقا قاراي ىتقىدى. 17 جاستاعى ويىنشى بۇل مۇمكىندىكتى ءمۇلت جىبەرمەي، جويقىن سوققىمەن گول سوقتى. ساتپايەۆتىڭ وسى ماۋسىمداعى 14ء-شى گولى الماتىلىق ۇجىمدى تۋرنيرلىك كەستەدە قايتادان العا شىعاردى.
ايتا كەتكەن ءجون، بيىل ءبىرىنشى تۋرداعى «استاناعا» قارسى ويىندا داستان چەمپيوناتتاعى العاشقى گولىن سوققان ەدى. ەسەپ تەڭەسكەن سوڭ، جىگەرلەنە تۇسكەن «قايرات» ويىنشىلارى تاعى بىرنەشە رەت ءقاۋىپتى چوندريچ قاقپاسىنا شابۋىل جاسادى. دەگەنمەن، كەيدە دالدىك، كەيدە ساتتىلىك جەتىسپەدى. ويىن سوڭىندا چەمپيوندىق ۋىسىنان شىعىپ بارا جاتقان ەلوردالىقتار بارىنشا جەڭىس گولىن سوعۋعا تىرىستى. 90+4 مينۋتتا بۇرىشتاما دوبىنان كەيىن مارين توماسوۆ قاقپاعا 1 مەتردەي جەردەن تىكەلەي سوققى جاسادى. الايدا، دوپ قاقپانىڭ ماڭدايشاسىنا ءتيىپ، الاڭ سىرتىنا كەتتى. تارتىستى ويىن 1:1 ەسەبىمەن اياقتالدى. ونىڭ ناتيجەسى بويىنشا «قايرات» 59 ۇپاي، ال «استانا» 57 ۇپاي جينادى. وسىلايشا الماتىلىق كوماندا قاتارىنان ەكىنشى رەت جانە ءوز تاريحىندا بەسىنشى رەت قازاقستان چەمپيونى اتاندى. بۇعان دەيىن كوماندا 1992، 2004، 2020، 2024 جىلدارى ەل بىرىنشىلىگىن جەڭگەن بولاتىن. ماچ اياقتالعان سوڭ، «قايرات» ويىنشىلارى ورتالىق ستاديوندا ماراپاتتالىپ، الاڭ ورتاسىندا چەمپيوندىق كۋبوكتى كوتەردى. ال كوكتوبە مۇناراسى الماتىلىق كوماندانىڭ تۇستەرىنە بويالىپ، «ماۋسىم ءۇشىن راحمەت» دەگەن جازۋ پايدا بولدى. ەكىنشى جىل قاتارىنان جەڭىسكە جەتكەن «قايرات» تاعى دا چەمپيوندار ليگاسىنا جولداما الدى. كوماندا وسى ماۋسىمدا ەندى سىرت الاڭدا «ينتەر»، «كوپەنگاگەن»، «ارسەنالمەن»، ال الماتىدا «وليمپياكوس» جانە «بريۋگگەمەن» كەزدەسەدى. ال 2026 جىلدىڭ جازىندا ۋەفا چەمپيوندار ليگاسىنىڭ ىرىكتەۋ كەزەڭىنە قاتىسادى.
وزگە قازاقستاندىق كلۋبتاردىڭ ناتيجەسىن توقتالىپ وتسەك، پرەمەر-ليگانى ەكىنشى ورىندا اياقتاعان «استانا» ۋەفا كونفەرەنسيالار ليگاسىنا قاتىسىپ، ەۋروجارىسقا ىرىكتەۋدى ەكىنشى كەزەڭنەن باستايدى. ال چەمپيوناتتا ءۇشىنشى جانە ءتورتىنشى ورىن العان – «توبىل» مەن «ەلىماي» ۋەفا كونفەرەنسيالار ليگاسىنا ىرىكتەۋدى ءبىرىنشى كەزەڭنەن باستايدى. 16 ۇپايمەن ەل بىرىنشىلىگىن سوڭعى ورىندا اياقتاعان «تۇران» كەلەسى ماۋسىمدا فۋتبولدان قازاقستان ءبىرىنشى ليگاسىنا ونەر كورسەتەدى. ويىنشىلار جەكە ناتيجەلەرى بويىنشا «استانا» شابۋىلشىسى گريپشي 16 گولمەن چەمپيوناتتىڭ ۇزدىك سۇرمەرگەنى اتاندى. ودان كەيىن 14 گول سوققان «قايرات» شابۋىلشىسى داستان ساتپايەۆ تۇر. ۇزدىك ۇشتىكتى 12 گولمەن مارين توماسوۆ تۇيىندەدى.
رافاەل ۋرازباحتين، «قايرات» فۋتبول كلۋبىنىڭ باس باپكەرى:
– ءۇزىلىس كەزىندە اڭگىمە جوعارى داۋىسپەن ءوتتى. ءبىرىنشى تايمداعى ويىنىمىز ۇنامادى. قاقپاعا سوققى از، ال قارسىلاس ءقاۋىپتى ساتتەردى كوبىرەك جاسادى. قارسىلاستى دا مويىنداۋ كەرەك. ولار بىزگە ويىن تىزگىنىن بەرىپ، كۇتپەگەن تاكتيكا قولداندى. ءبىز، كەرىسىنشە، ولار دوپقا كوبىرەك يەلىك ەتەدى دەپ ويلاعانبىز. ءبىراق ولار ءبىزدى ءوز الاڭدارىنا تارتىپ الدى. سول قارىمتا شابۋىلداردىڭ ءبىرى ارقىلى گول سوقتى. ۇزىلىستە ويىنشىلارعا: «بۇلاي بولمايدى. جانكۇيەرلەردىڭ الدىندا بۇلاي ويناۋعا حاقىمىز جوق. بۇكىل ستاديون ءبىزدى قولداۋعا كەلدى، ءبىز جەڭىلمەۋىمىز كەرەك» دەگەن سوزدەر ايتىلدى!
باستىسى، چەمپيون بولعانىمىزعا وتە قۋانىشتىمىز. بارلىق جانكۇيەرلەردى وسى جەڭىسپەن قۇتتىقتايمىن! بۇل ءبىز ءۇشىن تاريحي كۇن – «قايرات» العاش رەت قاتارىنان ەكى رەت چەمپيون اتاندى. ءبىز وسى جەتىستىككە ماقساتتى تۇردە ۇمتىلدىق. ويىنشىلارعا ۇلكەن العىس ايتامىن، بۇل ولاردىڭ ەڭبەگىنىڭ جەمىسى. قاجىرلى ەڭبەك ءوز ناتيجەسىن بەرەدى. ءبىز وتە قۋانىشتىمىز!