پرەزيدەنت قاسىم-جومارت توقايەۆ «قازاقستان – اكادەميالىق ءبىلىم بەرۋ اۋماعى» ستراتەگيالىق سەرىكتەستەر فورۋمىندا سويلەگەن سوزىندە ەلىمىزدە ChatGPT نەگىزىندەگى ءبىلىم بەرۋ قۇرالدارىن ەنگىزۋ بويىنشا پيلوتتىق جوبا ىسكە قوسىلعانىن مالىمدەدى، - دەپ حابارلايدى اqshamnews.kz ءتىلشىسى اقورداعا سىلتەمە جاساپ حابارلايدى.
قاسىم-جومارت توقايەۆ ءبىلىم-عىلىم سالاسىنا سالىنعان ينۆەستيسيا قازاقستاننىڭ جارقىن بولاشاعىنا قاراي جاسالعان قادام ەكەنىن، الدىمىزدا ەكونوميكانى جاڭعىرتۋ، جاڭا ءوندىرىس سەكتورلارىن قالىپتاستىرۋ، جاساندى ينتەللەكت تەحنولوگيالارىن بارلىق سالاعا ەنگىزۋ جانە قازاقستاندى تولىققاندى سيفرلىق مەملەكەت رەتىندە دامىتۋ ماقساتتارى تۇرعانىن جەتكىزدى.
"قازاقستان تەحنولوگياسى وزىق ەل بولۋعا نىق قادام باستى. بۇل – ءبىزدىڭ جاڭا ۇلتتىق بولمىسىمىزدىڭ اسا ماڭىزدى بولىگى دەپ ايتساق، قاتە بولمايدى. بۇگىن سپيكەرلەر جاساندى ينتەللەكتىنىڭ جاھاندىق ورتاق پروگرەستى ورگە سۇيرەيتىن جاڭا قوزعاۋشى كۇش رەتىندەگى رولىنە باسا ءمان بەردى. شىن مانىندە، وسى بىرەگەي تەحنولوگيانىڭ ارقاسىندا ادامزات العا قاراي قارىشتى قادام جاساي الادى. 2030 جىلعا قاراي جي الەمدىك ءىجو كولەمىن 15 تريلليون دوللاردان اسا ۇلعايتادى دەپ بولجانىپ وتىر. ءبىراق جاساندى ينتەللەكتىنىڭ دامۋىنان ەڭ كوپ پايدانى قاي ەل كورەدى؟ بۇل – وتە قىزىقتى ساۋال. ونى تەرەڭ زەردەلەپ، ساراپتاۋ قاجەت. جاۋابى اسا قيىن كورىنبەگەنىمەن، بۇل ماسەلە ادامزات كەلەشەگىمەن تىكەلەي بايلانىستى ەكەنىن مويىنداۋىمىز كەرەك. قازاقستاندا جاساندى ينتەللەكتىنى دامىتۋ جانە باسقا سالالارمەن جان-جاقتى ينتەگراسيالاۋ ەڭ جوعارى ستراتەگيالىق باسىمدىق سانالادى. جي ساراپشىلارى مەن ماماندارىن دايارلاۋ ىسىنە ايرىقشا ءمان بەرىپ وتىرمىز. وسى ماقساتتا جىل باسىنان بەرى AI Sana باعدارلاماسىن ىسكە قوستىق. 540 مىڭنان استام ستۋدەنت وقۋ كۋرسىنان ءوتتى. بۇدان بولەك، جاساندى ينتەللەكت بارلىق مەكتەپ پەن ۋنيۆەرسيتەتكە مىندەتتى كۋرس رەتىندە ەنگىزىلدى. ەلىمىزدە جاساندى ينتەللەكت ۋنيۆەرسيتەتىن اشۋ ءۇشىن دايىندىق جۇمىستارى جۇرگىزىلىپ جاتىر"، – دەدى پرەزيدەنت.
وسى ورايدا مەملەكەت باسشىسى قىركۇيەك ايىندا اقش-قا جاساعان ساپارى كەزىندە OpenAI كومپانياسىمەن ماڭىزدى ۋاعدالاستىققا قول جەتكىزىلگەنىن ەسكە سالدى.
"ناتيجەسىندە قازاقستان ChatGPT نەگىزىندە ءبىلىم بەرۋ قۇرالدارىن ەنگىزۋ جونىندەگى پيلوتتىق جوبانى جۇزەگە اسىرا باستادى. اتالعان باستامالار ارقىلى وتاندىق ءبىلىم بەرۋ سالاسىندا جاساندى ينتەللەكت الەۋەتىنە سۇيەنە وتىرىپ، كەشەندى سيفرلىق ترانسفورماسيا جاسالىپ جاتىر"، – دەدى قاسىم-جومارت توقايەۆ.