وڭىرلىك كوممۋنيكاسيالار قىزمەتىندە «الماتىنىڭ سيفرلانۋى: 2026 جىلعا ارنالعان جاڭا جوبالار مەن باستامالار، سونداي-اق وتكەن جىلدىڭ قورىتىندىسى» تاقىرىبىندا باسپا ءسوز كونفەرەنسياسى بولىپ ءوتتى. قالانىڭ ءبىلىم بەرۋ مەن دەنساۋلىق ساقتاۋ سالاسىنداعى سيفرلىق ترانسفورماسيانىڭ نەگىزگى باعىتتارى تۋرالى سيفرلاندىرۋ باسقارماسى باسشىسىنىڭ ورىنباسارى مەيرام دۇيسەكوۆ بايانداما جاسادى.
ونىڭ ايتۋىنشا، ءبىلىم بەرۋ سالاسىنداعى سيفرلاندىرۋ ەڭ الدىمەن وقۋشىلار مەن ولاردىڭ اتا-انالارى ءۇشىن قىزمەتتى قولجەتىمدى، ساپالى ەتۋگە باعىتتالعان. سيفرلىق ەكونوميكا ءۇشىن كادرلار دايارلاۋ اياسىندا قالادا ۇلكەن ىرىكتەۋ جۇمىسى جۇرگىزىلىپ، 10 مىڭ ۇمىتكەردىڭ ىشىنەن جاساندى ينتەللەكت سالاسىنداعى باعدارلامالار بويىنشا ءبىلىم الاتىن 1،5 مىڭ دارىندى وقۋشىنى تاڭداپ العان. ءبىلىم بەرۋ جۇيەسىندە مىڭ وقۋشىنى Junior-ىزدەنۋشى دەڭگەيىنە دەيىن دايىنداۋ دا جوسپاردا بار. بۇل جاسوسپىرىمدەرگە مەكتەپتى بىتىرمەي تۇرىپ IT سالاسىندا ءبىراز نارسەنى ءبىلىپ شىعۋىنا مۇمكىندىك بەرەدى. الداعى ۋاقىتتا مەكتەپتەگى وسىنداي ۇيىرمەلەرگە قاتىسقىسى كەلىپ ءوتىنىش بەرگەندەردىڭ ۇلەسى 90 پايىزعا جەتەدى دەگەن بولجام بار.
«ءبىز بالالاردىڭ وسى زامانعى تەحنولوگيالاردى مەڭگەرىپ، ءبىلىم الۋىنا جاعداي جاسايتىن جۇيە قۇرىپ جاتىرمىز. ءبىزدىڭ ماقساتىمىز – تەك سيفرلىق شەشىمدەردى ەنگىزۋ ەمەس، وقۋشىلاردىڭ دامۋىنا تۇرتكى بولىپ، وسى باستان بولاشاق ماماندىعىن وقىپ ۇيرەنۋىنە كومەكتەسۋ»، – دەدى مەيرام دۇيسەكوۆ.
2026–2027 جىلى الماتىدا بارلىق دياگنوستيكالىق كەسكىندەردى – رەنتگەن، كت، مرت مەن باسقا دا زەرتتەۋلەردى ءبىرتۇتاس سيفرلىق ارحيۆكە بىرىكتىرگەن PACS جۇيەسىن ەنگىزەدى. بۇل دارىگەرلەرگە پاسيەنتتەردىڭ مەديسينالىق دەرەكتەرىنە جەدەل قول جەتكىزۋگە، دياگنوستيكانىڭ دالدىگىن ارتتىرىپ، تەكسەرۋدىڭ قورىتىندىسىن كۇتەتىن ۋاقىتتى قىسقارتۋعا مۇمكىندىك بەرەدى.
سونىمەن قاتار، 2027 جىلعا قاراي قالا تۇرعىندارىنىڭ كەمىندە 70 پايىزى ەلەكتروندىق جەكە دەنساۋلىق كابينەتىن بەلسەندى پايدالاناتىن بولادى. بۇل كابينەتتەر ارقىلى ازاماتتار مەديسينالىق اقپاراتتى، تالداۋ ناتيجەلەرى مەن دارىگەرلەردىڭ ۇسىنىمدارىن ىڭعايلى ونلاين فورماتتا الا الادى.
«سيفرلىق مەديسينا – ەڭ الدىمەن پاسيەنتتەر ءۇشىن ىڭعايلىلىق پەن ۋاقىت ۇنەمدەۋ. ەلەكتروندىق دەنساۋلىق كابينەتتەرى ادامعا ءوز جاعدايىن جاقسىراق باقىلاپ، دەر كەزىندە كومەككە جۇگىنۋگە جاردەمدەسەدى»، – دەپ اتاپ ءوتتى سيفرلاندىرۋ باسقارماسى باسشىسىنىڭ ورىنباسارى.
دەرەكتەردى تالداۋ مەن باسقارۋعا دا ەرەكشە نازار اۋدارىلعان. قالانىڭ سيتۋاسيالىق ورتالىعىندا ءبىلىم بەرۋ مەن مەديسينا نىساندارى بويىنشا گاج-دەرەكتەرى بەلسەندى تۇردە قولدانىلا باستادى. اناليتيكالىق قۇرالدار ينفراقۇرىلىممەن قامتاماسىز ەتىلۋ دەڭگەيىن، سونىڭ ىشىندە مۇمكىندىگى شەكتەۋلى ادامدار ءۇشىن مەكتەپتەر مەن مەديسينالىق مەكەمەلەردىڭ قولجەتىمدىلىگىن باقىلاۋعا مۇمكىندىك بەرەدى، بۇل ءوز كەزەگىندە نەعۇرلىم ءدال شەشىمدەر قابىلداۋعا كومەكتەسەدى.
الماتىداعى سيفرلاندىرۋ جاعى جەكەلەگەن سەرۆيستى ەنگىزۋمەن شەكتەلمەي، تەحنولوگيالار قالا تۇرعىندارىنىڭ ءومىر ءسۇرۋ ساپاسىن ارتتىرۋعا قىزمەت ەتەتىن قالالىق ورتانى دامىتۋدىڭ كەشەندى تاسىلىنە اينالا باستادى.