الماتىدا سيفرلىق ينفراقۇرىلىمدى دامىتۋ جاعى ەكولوگيا مەن قوعامدىق قاۋىپسىزدىك سالاسىن دا قامتي باستادى. الماتى قالاسى سيفرلاندىرۋ باسقارماسى باسشىسىنىڭ ورىنباسارى مەيرام دۇيسەكوۆ وڭىرلىك كوممۋنيكاسيالار قىزمەتىندە وسى جۇمىستىڭ نەگىزگى باعىتىن باياندادى.
ەكولوگيا: اۋا داچيكتەرى، قتق مەن سۋ رەسۋرستارىن باقىلاۋ
ەكولوگيالىق باعىتتا ءۇش باسىم سالا ايقىندالعان: ەكولوگيالىق باقىلاۋ، قالدىقتاردى «اقىلدى» باسقارۋ مەن سۋ رەسۋرستارىن باسقارۋ.
بۇگىنگى تاڭدا قاتتى تۇرمىستىق قالدىقتاردى (قتق) جينايتىن ورىنداردى 730 كامەرانى بىرىكتىرگەن ءبىرىڭعاي بەينەمونيتورينگ جۇيەسى ارقىلى باقىلاپ وتىرادى. سونىمەن قاتار، قالدىقتاردى شىعاراتىن باعىتاردى GPS ارقىلى قاداعالاۋ دا قولعا الىنىپ، ءقازىر ول 65%-دى قامتىپ وتىر.
اۋا ساپاسىن باقىلاۋ سالاسىندا 296 داچيكتەن تۇراتىن جەلى جۇمىس ىستەيدى. ونىڭ ىشىندە 200 داچيكتى بىلتىر Almaty Air Initiative قورى ورناتىپ بەردى. بۇل اۋدانداعى اۋانىڭ جاي-كۇيىن نەعۇرلىم ناقتى باعالاۋعا مۇمكىندىك بەردى.
جوسپارداعى قوسىمشا ءىس-شارالار:
• سۋ قورعاۋ ايماقتارىن ءبىرىڭعاي بەينەمونيتورينگ جۇيەسى ارقىلى باقىلاۋدى كۇشەيتۋ؛
• ەكولوگيالىق باقىلاۋ ماقساتىندا درونداردىڭ ءبىرىڭعاي ينفراقۇرىلىمىن قۇرۋ؛
• قتق شىعاراتىن باعىتتاردى باقىلاۋ دەڭگەيىن 80%-عا دەيىن جەتكىزۋ.
مەيرام دۇيسەكوۆتىڭ ايتۋىنشا، سيفرلىق قۇرالداردى ەنگىزۋ جۇمىس بارىسىن بارىنشا اشىق ەتىپ، جەدەل ارەكەت ەتۋ مۇمكىندىگىن ارتتىرىپ، تابيعاتتى قورعاۋ جۇمىسىن نەعۇرلىم ءتيىمدى ەتە تۇسپەكشى.
قاۋىپسىزدىك: بەينەمونيتورينگتى كەڭەيتۋ جانە «112» ورتالىعىن ىسكە قوسۋ
قالادا جاساندى ينتەللەكت ەلەمەنتتەرى بار بەينەباقىلاۋ جۇيەلەرى، وقيعانى اۆتوماتتى تۇردە تانۋ تەحنولوگياسى مەن سيفرلىق حابارلاندىرۋ تەتىكتەرى كەڭىنەن قولدانىلا باستادى.
قازىرگى تاڭدا بارلىق مەكتەپتەر، بالاباقشالار مەن دەنساۋلىق ساقتاۋ نىساندارى قاۋىپسىزدىك جۇيەلەرىمەن جابدىقتالعان.
2023 جىلى قالادا 18 مىڭ كامەرا جۇمىس ىستەسە، ءقازىر ونىڭ سانى 65 مىڭعا جەتكەن. ياعني، بىرتە-بىرتە سانى دا، جۇمىستىڭ ساپاسى دا ءوسىپ كەلە جاتىر.
جول قاۋىپسىزدىگى باعىتىندا جول قوزعالىسى مەن جول ەرەجەسىنىڭ ساقتالۋىن باقىلاۋعا ارنالعان 1 641 اپپاراتتىق-باعدارلامالىق كەشەن ورناتىلعان.
بيىلعى 1 ناۋرىزعا دەيىن تاعى 350 «سەرگەك» كەشەنى ورناتىلماق.
2026–2027 جىلى مىناداي ءىس-شارالار كوزدەلگەن:
• جەكەمەنشىك كامەرالاردى ءبىرىڭعاي بەينەمونيتورينگ جۇيەسىنە قوسۋ؛
• 2026 جىلدىڭ وزىندە كامەرانىڭ جالپى سانىن 100 مىڭعا دەيىن جەتكىزۋ؛
• بەينەاناليتيكانىڭ قوسىمشا ءتۇرىن ەنگىزۋ؛
• 2026 جىلعى 1 قاراشاعا دەيىن «112» ءبىرىڭعاي جەدەل باسقارۋ ورتالىعىن قۇرۋ.
سونىمەن قاتار، قار كوشكىنىن باقىلاۋ مەن توتەنشە جاعدايدى ەرتە حابارلاۋ بويىنشا MassAlert جۇيەسى جۇمىس ىستەيدى.
مەيرام دۇيسەكوۆ اتاپ وتكەندەي، ەكولوگيا مەن قاۋىپسىزدىك سالاسىندا سيفرلىق شەشىمدەردى دامىتۋ نەعۇرلىم ورنىقتى، قورعالعان جانە تەحنولوگيالىق جاعىنان جابدىقتالعان قالالىق ورتانى قالىپتاستىرۋعا باعىتتالعان.