1-3 اقپان كۇندەرى ەل-كۋۆەيت قالاسىندا (كۋۆەيت) وتكەن كرەاتيۆتى يندۋستريانى دامىتۋعا ارنالعان حالىقارالىق فورۋمدا الماتى قازاقستاننىڭ كرەاتيۆتى ەكونوميكاسىنداعى جەتەكشى ورتالىقتاردىڭ ءبىرى رەتىندە تانىستىرىلدى. بۇل تۋرالى الماتى قالاسىنىڭ تۋريزم باسقارماسىنىڭ وكىلدەرى حابارلادى.
اتالعان فورۋم World Crafts Council باستاماسىمەن ۇيىمداستىرىلىپ، يۋنەسكو جانە وزگە دە حالىقارالىق ءارى ۇلتتىق ينستيتۋتتاردىڭ قاتىسۋىمەن ءوتتى. ءىس-شاراعا 34 ەلدەن مەملەكەتتىك ورگاندار، كرەاتيۆتى قاۋىمداستىقتار مەن مادەني مەكەمەلەردىڭ وكىلدەرى جينالدى.
فورۋمنىڭ ىسكەرلىك باعدارلاماسى اياسىندا الماتى دەلەگاسياسى قالاداعى كرەاتيۆتى يندۋستريانىڭ دامۋ باعىتى، قولدانىستاعى ينفراقۇرىلىم جانە ينستيتۋسيونالدىق قولداۋ تەتىكتەرى تۋرالى پرەزەنتاسيا ۇسىندى. سونىمەن قاتار، كرەاتيۆتى ەكونوميكا سالاسىندا حالىقارالىق ارىپتەستىكتى كەڭەيتۋ تۇرعىسىنان الماتىنىڭ مۇمكىندىكتەرى ەرەكشە اتالدى.
تالقىلاۋلار بارىسىندا الماتىنىڭ كرەاتيۆتى سالانى قولداۋ، كرەاتيۆتى كاسىپكەرلىكتى ىنتالاندىرۋ جانە مادەني ءتۋريزمدى دامىتۋداعى تاجىريبەسىنە نازار اۋدارىلدى. قاتىسۋشىلار تۇراقتى قالالىق كرەاتيۆتى ەكوجۇيە قالىپتاستىرۋ جانە حالىقارالىق بايلانىستاردى نىعايتۋ ماسەلەلەرى بويىنشا پىكىر الماستى.
باعدارلامانىڭ جەكە ءبولىمى الماتى مەن ەل-كۋۆەيت اراسىنداعى ىنتىماقتاستىق الەۋەتىنە ارنالدى. باسىم باعىتتار رەتىندە قولونەر كاسىپكەرلىگىن دامىتۋ، بىرلەسكەن كرەاتيۆتى جوبالاردى ىسكە اسىرۋ، فەستيۆالدەر، كورمەلەر مەن ءبىلىم بەرۋ باستامالارىن ۇيىمداستىرۋ ۇسىنىلدى.
فورۋم قورىتىندىسىندا 34 ەلدىڭ قالالارى مەن قولونەر قاۋىمداستىقتارى تاجىريبە الماستى. قالىپتاسقان كاسىبي بايلانىس الماتىنىڭ حالىقارالىق ارىپتەستىگىن ودان ءارى كۇشەيتىپ، كرەاتيۆتى يندۋستريانىڭ جاھاندىق كۇن تارتىبىنە بەلسەندى ارالاسۋىنا بەرىك نەگىز قالايدى.