الەۋمەتتىك جەلىدە مەكتەپ دالىزىندە قولىنا بالتا ۇستاعان وقۋشىنىڭ جۇگىرىپ جۇرگەن ۆيدەوسى تارادى. پوليسيا بۇل وقيعا 5 اقپاندا اتىراۋ وبلىسى قۇلسارى قالاسىنداعى مەكتەپتەردىڭ بىرىندە بولعانىن مالىمدەدى، دەپ حابارلايدى Aqshamnews.kz ءتىلشىسى.
بەينەجازبادا بالتا ۇستاعان وقۋشى وزگە ءبىر وقۋشىنى قۋىپ جۇرگەنى، ال ەكىنشى وقۋشىنىڭ سىنىپتاردىڭ بىرىنە كىرىپ، ەسىكتى ىشتەن بەكىتكەنى كورىنەدى. اتىراۋ وبلىستىق پد دەرەگىنشە، 10-سىنىپ وقۋشىسى قاتارلاستارىمەن جانجالدان كەيىن ولارعا شابۋىل جاساپ، كەيىن مەكتەپ اۋماعىنان شىعىپ كەتكەن.
وقيعا سالدارىنان ەكى وقۋشى جەڭىل دەنە جاراقاتىن العان. شاقىرتۋ تۇسكەن بويدا پوليسيا قىزمەتكەرلەرى جەدەل جەتىپ، كۇدىكتى ءجاسوسپىرىمدى انىقتاپ، ۇستاعان. وقيعاعا قاتىسۋشىلار مەن ولاردىڭ اتا-انالارى پوليسيا بولىمىنە جەتكىزىلدى.
اتالعان فاكتى بويىنشا بۇزاقىلىق دەرەگىمەن قىلمىستىق ءىس قوزعالدى. 15 جاستاعى كۇدىكتى ۋاقىتشا ۇستاۋ يزولياتورىنا قامالىپ، ىشكى ىستەر ورگاندارىنىڭ ەسەبىنە الىندى. ماتەريالدار كامەلەتكە تولماعاندار ءىسى جونىندەگى كوميسسياعا جولداندى.
سونداي-اق اتا-اناسىنا كامەلەتكە تولماعاندى تاربيەلەۋ مىندەتىن تيىسىنشە ورىنداماعانى ءۇشىن اكىمشىلىك ءىس قوزعالعان. قىلمىستىق ءىس اياسىندا ءبىلىم بولىمىنە قىلمىسقا ىقپال ەتكەن سەبەپتەر مەن جاعدايلاردى جويۋ تۋرالى ۇسىنىس ەنگىزىلگەن. تەرگەۋ قورىتىندىسى بويىنشا ءبىلىم ۇيىمىنىڭ لاۋازىمدى تۇلعالارى مەن وقۋ ورنىن كۇزەتكەن كۇزەت اگەنتتىگى قىزمەتكەرلەرىنىڭ ارەكەتىنە قۇقىقتىق باعا بەرىلەتىنى حابارلاندى.