قازاقستاننىڭ ازاماتتىق اليانسى «ۇستانىم» ۇلتتىق پىكىرتالاس كلۋبىنىڭ «كونستيتۋسيا: قازاقستاننىڭ تاريحي تاڭداۋىنىڭ ايناسى» تاقىرىبىنا ارنالعان وتىرىسىن وتكىزدى. تالقىلاۋ ەلىمىزدە جۇزەگە اسىرىلىپ جاتقان كونستيتۋسيالىق وزگەرىستەر اياسىندا ءوتتى.
جيىنعا ساراپشىلار قاۋىمداستىعىنىڭ وكىلدەرى، ۇكىمەتتىك ەمەس ۇيىمداردىڭ جەتەكشىلەرى، ەلىمىزدىڭ 20 وڭىرىندەگى ازاماتتىق اليانستاردىڭ كوشباسشىلارى، سونداي-اق قوعامدىق كەڭەستەردىڭ ءتوراعالارى مەن مۇشەلەرى قاتىستى. بۇل الاڭنىڭ كەڭ وڭىرلىك جانە كاسىبي وكىلدىككە يە بولۋىن قامتاماسىز ەتتى.
كۇن تارتىبىندە ازاماتتىق قوعام ينستيتۋتتارىنىڭ كونستيتۋسيالىق رەفورمانى ىسكە اسىرۋعا قاتىسۋى، مەملەكەتتىك ورگاندارمەن ءوزارا ءىس-قيمىل تەتىكتەرىن جەتىلدىرۋ جانە رەفورمالاردى ازىرلەۋ مەن تالقىلاۋ ۇدەرىسىنە قوعامنىڭ كەڭىنەن قاتىسۋىن ارتتىرۋ ماسەلەلەرى قارالدى.
وتىرىس قورىتىندىسى بويىنشا قازاقستاننىڭ ازاماتتىق اليانسى كونستيتۋسيالىق رەفورمانى قولداۋ جونىندە رەسمي مالىمدەمە جاساپ، ونىڭ ەلدىڭ ساياسي جۇيەسىن ودان ءارى دامىتۋداعى ماڭىزىن اتاپ ءوتتى. سونداي-اق كونستيتۋسيالىق كوميسسيا مۇشەلەرىنە اتقارعان جۇمىسى جانە ازاماتتىق قوعام ۇسىنىستارىنا نازار اۋدارعانى ءۇشىن العىس ءبىلدىرىلدى.