مەملەكەت باسشىسىنىڭ تاپسىرماسى مەن 2025 جىلعى جەلتوقساندا بەكىتىلگەن ستراتەگيالىق قۇجاتتارعا سايكەس، الماتىدا سيفرلاندىرۋدى دامىتۋ مەن جاساندى ينتەللەكت تەحنولوگيالارىن ەنگىزۋ بويىنشا جۇيەلى جۇمىس جۇرگىزىلىپ جاتىر. 2026 جىل رەسمي تۇردە سيفرلاندىرۋ جانە جاساندى ينتەللەكت جىلى دەپ جاريالانىپ، بۇل ەلدىڭ تەحنولوگيالىق تۇرعىدا جاڭعىرىپ، ورنىقتى ءارى تۇرعىندار ءۇشىن قولايلى قالالىق ورتانى قالىپتاستىرۋعا باعىتتالعان ستراتەگيالىق باعىتىن ايقىندايدى.
الماتىنىڭ سيفرلاندىرۋ باسقارماسى باسشىسىنىڭ ورىنباسارى مەيرام دۇيسەكوۆتىڭ ايتۋىنشا، 2026–2030 جىلعا ارنالعان Smart City الماتى دامۋ ستراتەگياسى مەن اكىمدىكتىڭ سيفرلىق ترانسفورماسيا كارتاسىندا نەگىزگى باسىمدىق بەكىتىلگەن. بۇل قۇجاتتار كولىك پەن تۇرعىن ۇي-كوممۋنالدىق شارۋاشىلىقتى، قوعامدىق قاۋىپسىزدىك پەن ەكولوگيانى، دەنساۋلىق ساقتاۋ مەن ءبىلىم بەرۋدى، مادەنيەت پەن ءتۋريزمدى، يننوۆاسيالىق ەكونوميكا مەن ەلەكتروندىق سەرۆيستى دامىتۋدى قامتىعان.
ينتەللەكتۋالدى كولىك جۇيەسىن دامىتۋعا ەرەكشە كوڭىل بولىنگەن. سيفرلاندىرۋ باسقارماسىنىڭ مالىمەتىنشە، الماتىنىڭ كولىك حولدينگى قوعامدىق كولىكتىڭ قوزعالىسىن ديسپەچەرلەۋ مەن باقىلاۋدى قامتاماسىز ەتەدى: اۆتوبۋستار بەينەكامەرامەن، GPS-ترەكەرمەن جابدىقتالعان. ONAY قوسىمشاسى ارقىلى ءبىرىڭعاي ەلەكتروندىق تولەم جۇيەسى جۇمىس ىستەيدى.
الداعى ۋاقىتتا بانك كارتالارى ارقىلى، سونداي-اق Apple Pay مەن Samsung Pay سەرۆيستەرى ارقىلى جولاۋشىلارعا ىڭعايلى بولۋى ءۇشىن تولەمنىڭ بالاما ءتاسىلىن ىسكە قوسۋ جوسپارلانىپ وتىر.
2026–2027 جىلى قالاداعى 1 188 ايالداماعا ەلەكتروندىق تابلولار ورناتىلادى. ينتەللەكتۋالدى كولىك جۇيەسى دە ەنگىزىلىپ، كەيىن ول قالانىڭ سيفرلىق سىڭارىمەن بىرىكتىرىلەدى. بۇل كولىك اعىنىن ۋاقىتىلى تالداۋعا، جۇكتەمەنى بولجاپ، جولداعى جاعدايدى جەدەل باسقارۋعا مۇمكىندىك بەرمەك.
جۇرگىزۋشىسىز كولىك باعدارلاماسىنىڭ پيلوتتىق ءتۇرىنىڭ ىسكە قوسىلۋى ەڭ اۋقىمدى جوبانىڭ ءبىرى بولدى. Yandex Kazakhstan كومپانياسىمەن بىرلەسىپ، بيىلعى 1 مامىرعا دەيىن قالانىڭ جولدارىنا جۇرگىزۋشىسى جوق 50 اۆتوكولىكتى شىعارۋ جوسپارلانىپ وتىر.
مەيرام دۇيسەكوۆتىڭ ايتۋىنشا، مۇنداي شەشىمدەردى ەنگىزۋ قالانىڭ يننوۆاسيالىق ەكوجۇيەسىن قالىپتاستىرۋداعى ماڭىزدى قادام بولىپ، الماتىنىڭ تەحنولوگيالىق تارتىمدىلىعىن ارتتىرا تۇسپەكشى.
اتالعان باستامالاردى جۇزەگە اسىرۋ تۇرعىنداردىڭ ءومىر ساپاسىن ارتتىرۋعا باعىتتالعان اقىلدى، ءقاۋىپسىز جانە تەحنولوگيالىق تۇرعىدان دامىعان قالانى قالىپتاستىرۋدى كوزدەيدى.