بالي ارالىندا قاماۋعا الىنعان قازاقستاندىق مودەل گۇلسەزىم التايبەكوۆاعا قاتىستى سوت ۇكىمى شىقتى، دەپ حابارلايدى Aqshamnews.kz ءتىلشىسى.
ءىس ماتەريالدارىنا سايكەس، سوت التايبەكوۆانى جابىرلەنۋشىگە كەلتىرىلگەن شىعىندى وتەۋگە مىندەتتەپ، ءتورت اپتاعا باس بوستاندىعىنان ايىرۋ جازاسىن تاعايىندادى. بۇل تۋرالى جابىرلەنۋشى رەتىندە تانىلعان رەسەيلىك بلوگەر كارينا فادەيەۆا مالىمدەدى.
وقيعا بالي ارالىنداعى دەمالىس ورىندارىنىڭ بىرىندە بولعان. تەرگەۋ دەرەكتەرىنە سۇيەنسەك، جانجال ويىن-ساۋىق ورنىندا تۋىنداعان. ايىپتاۋ نۇسقاسى بويىنشا، قازاقستاندىق مودەل رەسەيلىك بلوگەرگە بوتەلكە لاقتىرىپ، ونى جاراقاتتاعان. وسىدان كەيىن وعان رەسمي ايىپ تاعىلعان.
اقپاراتقا سايكەس، گۇلسەزىم التايبەكوۆا كەشىرىم سۇراعانىمەن، ماتەريالدىق شىعىندى وتەۋدەن باس تارتقان.
الەۋمەتتىك جەلىلەردە وقيعاعا قاتىستى ءتۇرلى بولجامدار تاراعانىمەن، جابىرلەنۋشى تاراپ ولاردىڭ كەيبىرىن جوققا شىعاردى. قازىرگى ۋاقىتتا التايبەكوۆا قاماۋدا وتىر، سوندىقتان ءىس بويىنشا ءوزىنىڭ رەسمي ۇستانىمىن جاريالاعان جوق.